yildirim türkiyening 2018 - yilliq éksport pilanini élan qildi

türkiye awazi radiyosi xewiri: bash ministir binali yildirim, éksportta yéqinqi 15 yildin buyanqi eng yaxshi ikkinchi yilning bu yil bolghanliqini tekitlep, «157 milyard dollarliq éksport nishanini halqip, rékort yarattuq. 2018 – yili 170 milyard dollar éksport nishanini békittuq, inshaallah u nishanni ishqa ashurimiz» dégenlerni qeyt qildi.

adalet we tereqqiyat partiyesi bashliq wekili binali yildirim, qirshehirde partiyesining altinchi nöwetlik wilayetlik qurultiyida söz qilip, küch chiqirishliri netijiside dölet iqtisadining üch hesse zorayghanliqini bildürdi we kishi béshigha toghra kélidighan milliy kirimning 3 mingdin dollardin 11 ming dollargha chiqqanliqini eskertti.

bash ministir binali yildirim sözini dawamlashturup, «rayonimizdiki döletlerning aramini buzushliri yetmigendek, rayonida yéngi mesililerni peyda qilishqa urunushmaqta. köngül jughrapiyemizning héchbir yérige yalqun chüshüshini xalimaymiz. eger mushundaq bir yalqun chüshidighan bolsa, u bizning könglimizge chüshken bolidu. epsuski, jughrapiyemizge nezirini tikken yaman niyetlikler bar. bularni bilip turuwatimiz. xususen qérindash iran xelqining bu oyunlargha qarita hoshyar bolushini xalaymiz. bizge nisbeten iranning muqimliq we xatirjemliki muhimdur. iranning xatirjemlikini buzush üchün sirttin mudaxile qilinishini qetiy toghra, dep qarimaymiz. türkiye, öz menpeetini qoghdighandek, dost we qérindashlirining menpeetinimu qoghdashqa tirishchanliq qiliwatqan bir dölettur» dédi.