bash elchi önal xelqara jemiyetning süriye mesilisige tutqan pozitsiyesini özgertishini telep qildi

türkiye awazi radiyosi xewiri: bash elchi önal b d t xewpsizlik kéngishining süriyening siyasiy we insanperwerlik weziyiti toghrisidiki yighinida söz qildi؛ u 13 yildin buyan dawam qiliwatqan süriyediki toqunush sewebidin insanperwerlik, siyasiy, bixeterlik we iqtisadiy weziyetning yamanliship ketkenlikini otturigha qoyup: «térrorluq süriyening siyasiy birliki we zémin pütünlüki bilen birlikte, rayonning tinchliqi we muqimliqidiki eng chong tehditke aylandi» dédi.

önal barliq alaqidar tereplerning réal nuqtida turup weziyetni muhakime qilishi kéreklikini eskertip, süriye toqunushigha sijil chare tépishning asasliq telipining, süriye xelqining arzulirigha mas kélidighan ortaq milliy tonushni barliqqa keltürüsh ikenlikini tekitlidi.

xelqara jemiyetningmu bu nishanni qollash üchün omumiy pozitsiyesige qayta qarap chiqishi kéreklikige isharet qilghan önal: «bu arqa körünüshte, (süriyeliklerning) siyasiy, bixeterlik we insanperwerlik saheliridiki özara küchlendürüsh musapisige aktip qatnishishqa kapaletlik qilish kérek. shuning bilen bir waqitta, musapirlarning qaytip kélishige qolayliq yaritish we (süriyening) baldurraq eslige kélishini kéchiktürmeslik texirsizliktur» dédi.

u nuqtiliq halda üch asasiy mesiliside pozitsiyeni özgertishning zörüriyitini tekitlep, bularning birinchisining b d t ning qollishi astida siyasiy musapini janlandurush ikenlikini otturigha qoydi.

pozitsiye özgertish zörür bolghan nuqtilarning ikkinchisining bir térrorluq teshkilatigha qarshi küreshni ikkinchi bir térrorluq teshkilatigha hawale qilish xataliqigha xatime bérish ikenlikini tilgha alghan önal: «atalmish <süriye démokratik küchliri> bir bölgünchi teshkilat. u ne süriyege mensup emes, ne démokratik emes. u p k k / y p g ning del özi» dédi.

önal pozitsiye özgertishke tégishlik üchinchi nuqtining musapirlarning öz ixtiyarliqi bilen bixeter we izzet-hörmiti qoghdalghan halda yurtlirigha qaytishigha kapaletlik qilish bolup, buning toqunushni hel qilish musapisining bir qismi bolushi kéreklikini qeyt qildi.

bash elchi önal türkiyening süriyening tinchliqi we muqimliqigha kapaletlik qilish üchün, her qaysi terepler bilen berpachi alaqini saqlap, küch serp qilishni dawamlashturidighanliqini eskertti.