ھاماس تەرەپدارلىرىنىڭ ساقچى ماشىنىسىنى بۇلاپ قاچقانلىقى توغرىسىدىكى خەۋەرنىڭ يالغانلىقى تەكىتلەندى

تۈركىيە ئاۋازى رادىيوسى خەۋىرى: تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسى يالغان تەشۋىقاتقا تاقابىل تۇرۇش مەركىزى «پەلەستىن ئىسلامىي قارشىلىق كۆرسىتىش ھەرىكىتى – ھاماس قوللىغۇچىلىرى شىۋېتسىيەدىكى نامايىشلىرى جەريانىدا ساقچى ماشىسىنى بۇلاپ قاچتى» دېگەن خەۋەرنىڭ توغرا ئەمەسلىكىنى بىلدۈردى.

مەركەزنىڭ باياناتىدا، مەزكۇر ناتوغرا تەشۋىقاتقا ئالاقىدار ئىكەنلىكى ئىلگىرى سۈرۈلگەن سۈرەتلەرنىڭ 2022 – يىلى ئاپرېلدا دانىيەلىك ئاشقۇن ئوڭچىل سىياسەتچى راسمۇس پالۇداننىڭ شىۋېتسىيەنىڭ ھەر قايسى شەھەرلىرىدە سادىر قىلغان «قۇرئان كەرىمنى كۆيدۈرۈش» قۇتراتقۇلۇقىغا قارشى نامايىشلار جەريانىدا تارتىلغانلىقى قەيت قىلىندى.

باياناتتا: «بىر قىسىم ئىجتىمائىي تاراتقۇلاردا ھەمبەھرىلەنگەن <شىۋېتسىيەدىكى نامايىشتا ھاماسنىڭ قوللىغۇچىلىرى ساقچى ماشىنىسىنى بۇلاپ قاچتى> دېگەن ئەيىبلەشلەر  توغرا ئەمەس. بۇ سۈرەتلەرنىڭ ئىلگىرى سۈرۈلۈۋاتقىنىدەك ئىسرائىلىيەنىڭ غەززەگە قىلغان ھۇجۇمىغا مۇناسىۋەتلىك نامايىشلار بىلەن مۇناسىۋىتى يوق» دېگەن ئىبارىلەرگە ئورۇن بېرىلدى.