dölet erbabliri 30- awghust zeper bayrimi munasiwiti bilen anitqabirni ziyaret qildi
30- awghust zeper bayrimining 101 yilliqi türkiyening herqaysi jaylirida we türkiyening chet ellerdiki wakaletxanilirida her xil murasimlar ötküzülüp tebriklenmekte.
türkiye awazi radiyosi xewiri: tebriklesh paaliyetliri dairiside paytext enqerediki tunji murasim mustapa kamal atatürkning qebrisi jaylashqan anitqabir (atatürk xatire sariyi)da ötküzüldi.
jumhur reis rejep tayyip erdoghan bashchiliqidiki dölet erbabliri 30- awghust zeper bayrimi munasiwiti bilen anitqabirni ziyaret qildi.
erdoghan atatürkning meqberisige ay – yultuz chüshürülgen gülchembirek qoyghandin kéyin, hörmet bildürüp sükütte turuldi, andin dölet shéiri oquldi.
andin jumhur reis erdoghan bilen döletning yuqiri derijilik emeldarliri misaqi milliy munarining yénigha bardi؛ bu yerde erdoghan anitqabir alahide xatire deptirige köngül sözlirini izhar qilip: «hörmetlik atatürk, biz türk millitining erkinlik we musteqilliq idiyesining ölmes abidisi dep qarawatqan ulugh ghelibening 101 yilliqini tebriklewatqanliqimizdin pexirlenmektimiz. shanliq tariximizning burulush nuqtilirining biri bolghan bügün, biz aliylirini, sepdashliringizni, büyük millet mejlisining hörmetlik ezalirini we eziz shéhitlirimizni minnetdarliq bilen esleymiz. zamaniwiy medeniyetler sewiyesidimu halqip kétish nishanimizning simwoligha aylanghan <türkiye yüz yili> qarishimizni dölet – xelq qolmuqol tutushup, zor irade bilen emelge ashuruwatimiz. dölitimizni nishanlirigha, xelqimizni esirlik arzulirigha yetküzgiche kéche – kündüz démestin ishleshni dawamlashturimiz. rohingiz shad bolsun!» dep yazdi.
anitqabir dölet murasimidin kéyin ammigha échiwétildi.
30- awghust zeper bayrimi dölet ichi we sirtida her xil murasimlar ötküzülüp tebriklimekte.
