fidan: qaradéngiz ashliq kélishimi türkiye üchün intayin muhim
dölitimiz (türkiye jumhuriyiti) tashqi ishlar ministiri xaqan fidan qaradéngiz ashliq kélishimini qayta yolgha qoyushning türkiye üchün intayin muhimliqini éytti.
türkiye awazi radiyosi xewiri: tashqi ishlar ministiri xaqan fidan qaradéngiz ashliq kélishimini qayta yolgha qoyushning türkiye üchün intayin muhimliqini, jumhur reis rejep tayyip erdoghanning bu mesilide nahayiti sistémiliq halda xizmet ishlewatqanliqini bayan qildi.
ministir fidan tünügün ziyarette bolghan ukrainaning paytexti kiyéwda élan qilghan bayanatida, türkiye we birleshken döletler teshkilatining muressechiliki netijiside yolgha qoyulghan, mudditi 17 – iyul küni toshqan qaradéngiz ashliq kélishimi sayisida 33 milyon tonnidin artuq ashliq hem yémeklik mehsulatlirining dunya bazarlirigha sélinghanliqini tekitlep mundaq dédi: «tolimu epsuski, qaradéngiz ashliq kélishimining mudditi17-iyul küni toshti. xelqara jemiyetning nöwette ashliq éksporti üchün bashqa yollar üstide izdiniwatqanliqini bilimiz. lékin bu yollarning qaradéngiz ashliq kélishimining ornini basalmaydighanliqi we xeterlik ikenlikini körüwatimiz. qaradéngiz ashliq kélishimining paydiliri yoqilip kétishtin ilgiri bu basquchni tézdin eslige keltürüsh yolida nahayiti zor tirishchanliq körsitiwatimiz. shu wejidin, herqaysi terepler bilen dawamliq söhbetlishiwatimiz.»
fidan qaradéngiz ashliq kélishimini qayta yolgha qoyush meqsitide ishliniwatqan xizmetler heqqide toxtilip mundaq dédi: «qaradéngiz ashliq kélishimining qayta yolgha qoyulushi türkiye üchün intayin muhim. chünki bu kélishim dunya ashliq bixeterliki we insaniy éhtiyajlar üchün nahayiti zor ehmiyetke ige. jumhur reisimiz rejep tayyip erdoghan bu mesilide nahayiti sistémiliq halda xizmet ishlewatidu. bu dairide ukraina, birleshken döletler teshkilati, rusiye, yawropa we amérika dairiliri bilen dawamliq uchrishishlar, özara pikir almashturushlar élip bériliwatidu. bizning bu mesilidiki xizmitimiz we tirishchanliqimiz izchil dawamlishidu.»
ministir fidan kéyinche kiyéwda qirim tatar türk jemiyitining rehberliri bilen körüshti.
türkiye tashqi ishlar ministirliqining ammiwi ortaqlishish tor béti X sehipiside élan qilinghan bayanatida bildürülüshiche, ministir fidan uchrishishta türkiyening qirim tatar türklirining heq – hoquqlirini qoghdash we xelqaraliq ornini mustehkemlesh yolidiki barliq teshebbuslarni qollaydighanliqini bildürgen.
