türkiye stokholmdiki quran kerimge hujum qilish qilmishini eyiblidi

türkiye awazi radiyosi xewiri: türkiye tashqi ishlar ministirliqi teripidin bu heqte élan qilinghan yazma bayanatta, iraqning stokholm elchixanisining aldida quran kerimge hujum qilish qilmishi qattiq  eyiblinip mundaq déyildi: «iraqning stokholm elchixanisining aldida muqeddes kitabimiz  quran kerim nishan qilinghan peskeshlerche hujumni qattiq eyibleymiz. stokholmda 2023-yili 6-ayning 28-küni, bir jamening aldida quran kerimge peskeshlerche hujum qilish qilmishi yüz bergendin kéyin, birleshken döletler teshkilati kishilik hoquq kéngishi  2023-yili 7-ayning 12-küni qarar maqullap, quran kerim nishan qilinghan hujumlarni <diniy öchmenlik> dep békitkenidi.»

«shiwéytsiyedin birleshken döletler teshkilati, yawropa bixeterlik we hemkarliq teshkilati we yawropa kéngishidiki mejburiyetlirini öz ichige alghan xelqaraliq mesuliyetliri dairiside, islam dini we milyardlighan kishilerge qaritilghan bu öchmenlik jinayetlirining aldini élish üchün tégishlik tedbirlerni qollinishini kütüwatimiz. türkiye islam düshmenliki, chet elliklerge öchmenlik qilish, irqchiliq we ayrimchiliq qilish qilmishlirigha qarshi küreshte bundaq hujumlar yüz bériwatqan döletler bilen hemkarlishishqa teyyar.»

ilgiri shiwéytsiyede quran kerimni köydürgen esli iraqliq salwan momika tünügün stokholmdiki iraq elchixanisi aldida quran kerim  we iraq bayriqini dessep, islam dinigha haqaret qilghanidi.

momika 28-iyun qurban héytning birinchi küni stokholm jamesining aldida saqchilarning qoghdishi astida quran kerimni köydürgenidi.

türkiye, iraq, pakistan, hindonéziye we afghanistanni öz ichige alghan islam döletliridin sirt yene, amérika qoshma ishtatliri we rusiyeni öz ichige alghan köpligen döletler bu qilmishqa qattiq naraziliq bildürgenidi.