دۇنيا ئەللىرى تۈركىيەگە يار - يۈلەك بولۇشنى داۋاملاشتۇرماقتا

تۈركىيە ئاۋازى رادىيوسى خەۋىرى: تەيبېيدىكى تۈركىيە سودا ئىشخانىسى ئىجتىمائىي تاراتقۇدىكى ئادرېسىدا بايانات ئېلان قىلىپ، تەيۋەن خەلقىنىڭ يەر تەۋرەشنىڭ زەربىسىگە ئۇچرىغۇچىلارغا ئىئانە قىلغان 10 مىڭ ئەدىيال، 600 چېدىر، بەش دالا دوختۇرخانىسى چېدىرى قاتارلىق ياردەم بۇيۇملىرى بېسىلغان تۈركىيە ھاۋا يوللىرى شىركىتى ئايروپىلانىنىڭ پايتەخت تەيبېيدىن تۈركىيەگە قاراپ يولغا چىققانلىقىنى ئۇقتۇردى.

تەيۋەن ئەۋەتكەن 150 توننا ياردەم ئەشياسى ئالدىنقى كۈنى تۈركىيەگە يېتىپ كەلگەنىدى. يەر تەۋرەشتىن كېيىن تۈركىيەگە قاراپ يولغا چىققان 130 كىشىلىك تەيۋەن ئىزدەش-قۇتقۇزۇش ئەترىتى، ئادىياماندىكى ئىزدەش – قۇتقۇزۇش خىزمەتلىرىگە ھەمدەم بولماقتا.

خىتايمۇ يەر تەۋرەشلەردىن كېيىن تۈركىيەگە ئاپەت ياردەم بۇيۇملىرى سۈپىتىدە داۋالاش ئەسلىھەلىرى ۋە باشقا ئەشيالارنى ئەۋەتىدىغانلىقىنى ئېلان قىلدى؛ خىتاي تاشقى ئىشلار مىنىستىرلىقى باياناتچىسى ۋاڭ ۋىنبىن پايتەخت بېيجىڭدا ئۆتكۈزۈلگەن قەرەللىك مۇخبىرلارنى كۈتۈۋېلىش يىغىنىدا، ئەدىيال ۋە چېدىر قاتارلىق جىددىي قۇتقۇزۇش بۇيۇملىرىنى ئۆز ئىچىگە ئالغان ياردەمنىڭ بىرىنچى قىسمىنىڭ 11-ۋە 12-فېۋرال كۈنلىرى تۈركىيەگە يېتىپ بارغانلىقىنى بىلدۈردى.

ئۇنىڭ ئېيتىشىچە، ياردەملەرنىڭ ئېلېكتىر كاردىئوگرافىيەسى ۋە ئۇلترا ئاۋاز دولقۇنى ئۈسكۈنىلىرى، تېببىي تىرانسپورت ماشىنىلىرى، ئېلىپ يۈرۈشكە ئەپلىك بىمار كارىۋىتى قاتارلىق ئىككىنچى قىسمىنىڭ بۇ ھەپتە ئەۋەتىلىشى پىلانلانماقتا ئىكەن.

جەنۇبىي كورېيە پىرېزىدېنتى يون سۇك يېئول، قاھرامانماراش مەركەزلىك يەر تەۋرەشلەر سەۋەبىدىن بارلىق مەنبەلەرنى سەپەرۋەر قىلىش توغرىسىدا بۇيرۇق چۈشۈردى؛ جەنۇبىي كورېيە پىرېزىدېنتلىق مەھكىمىسى باياناتچىسى لى دو ۋون پىرېزىدېنت يونغا ۋاكالىتەن بايانات ئېلان قىلىپ: «يون، <قان بىلەن مۇستەھكەملەنگەن ئىتتىپاقداش ۋە قېرىنداش دۆلەت> بولۇش سۈپىتى بىلەن، جەنۇبىي كورېيەنىڭ، تۈركىيەنىڭ يەر تەۋرەشتىن كېيىنكى ئەسلىگە كېلىشىگە ياردەم قىلىش ئۈچۈن، باشقىلارغا قارىغاندا تېخىمۇ قىزغىن بولۇشى كېرەكلىكىنى ئېيتتى. تۈركىيە ھازىر ئەڭ ئېھتىياجلىق بولۇۋاتقان نەرسىلەر چېدىر، دورا، داۋالاش بۇيۇملىرى ئىكەنلىكىنى ئەسكەرتكەن يون، تاشقى ئىشلار، مۇداپىئە ۋە سانائەت مىنىستىرلىقى قاتارلىق بارلىق مىنىستىرلىقلارنىڭ مەۋجۇت بارلىق مەنبەلىرىنى سەپەرۋەر قىلىپ، ئەڭ كۆپ مىقداردا ياردەم ماتېرىياللىرى بىلەن تەمىنلىشىنى ۋە بۇ تەدبىرلەر ھەققىدە تۈركىيە تەرەپ بىلەن تېزدىن ئالاقە ئورنىتىلىشىنى خالايدىغانلىقىنى ئەسكەرتتى» دېدى.

جەنۇبىي كورېيە پارلامېنت ئەزالىرىمۇ مائاشلىرىنىڭ ئۈچ پىرسەنتىنى يەر تەۋرەشنىڭ زەربىسىگە ئۇچرىغانلارغا ئىئانە قىلىدۇ.

كولومبىيە، يەر تەۋرەشنىڭ زەربىسىگە ئۇچرىغۇچىلارغا ياردەم بېرىش ئۈچۈن، 20 مۇتەخەسسىستىن تەركىب تاپقان كەسپىي خادىملار ئەترىتىنى تۈركىيەگە يوللىدى.

بۇنىڭدىن ئىلگىرى 101 ئادەمدىن تەركىب تاپقان ئىزدەش-قۇتقۇزۇش ئەترىتىنى تۈركىيەگە ئەۋەتكەن قازاقىستاندا ئېچىلغان يەر تەۋرەشكە ياردەم بېرىش بانكا ھېساباتىدىكى ھازىرغىچە توپلانغان 2 مىليون 849 مىڭ 836 دوللار پۇل، تۈركىيە ئاپەت ۋە جىددىي ئىشلارغا تاقابىل تۇرۇش ئىدارىسى _ ئافادنىڭ رەسمىي ھېساباتىغا يۆتكەلدى. قازاقىستان پىرېزىدېنتى قاسىم جۆمەرت توقايېۋ ھۆكۈمەتنى تۈركىيەدىكى يەر تەۋرەشنىڭ زەربىسىگە ئۇچرىغانلار ئۈچۈن چېدىر، ئىسسىتىش ئۈسكىنىلىرى، ئىسسىق كىيىم ۋە باشقا ئاساسلىق ئېھتىياجلارنى ئۆز ئىچىگە ئالغان قوشۇمچە ئىنسانپەرۋەرلىك ياردىمى ئەۋەتىشكە بۇيرۇدى.

قىرغىزىستان ئۈچىنچى تۈركۈم ئىزدەش-قۇتقۇزۇش ئەترىتىنى تۈركىيەگە ئەۋەتىشكە تەييارلانماقتا؛ ئىگىلىنىشىچە، ئايروپىلاندا قىرغىزىستان جىددىي ئەھۋاللار مىنىستىرى بوبېك ئاكىيېفېۋ باشچىلىقىدىكى ئەترەتتىن باشقا، دالا دوختۇرخانىسى، قۇتقۇزۇش ماشىنىسى ۋە 52 دانە چېدىر بار.

ئۆزبېكىستان مەملىكەت مىقياسىدىكى ياردەم توپلاش سەپەرۋەرلىك ھەرىكىتى دائىرىسىدە، يەر تەۋرەشنىڭ زەربىسىگە ئۇچرىغۇچىلار ئۈچۈن توپلانغان 170 توننا ئىنسانپەرۋەرلىك ياردىمىنى تۈركىيەگە ئەۋەتتى. ئۆزبېكىستان پۇقرالىرىنىڭ نەق پۇل ياردەملىرىنىڭ داۋاملىشىۋاتقانلىقى، ئۆزبېكىستانلىق ئاشپەزلەرنىڭ يەر تەۋرەش رايونىدىكى بەش مىڭ كىشىگە كۈنىگە ئىككى ۋاق تاماق تارقىتىۋاتقانلىقى بىلدۈرۈلدى.

تۈركىيەنىڭ ئاشخاباتتا تۇرۇشلۇق باش ئەلچىسى توگان ئورال، تۈركمەنىستاننىڭ قاھرامانماراشتىكى يەر تەۋرەشنىڭ زەربىسىگە ئۇچرىغۇچىلارغا ئۈچىنچى ياردەم ئايروپىلانىنى تەييارلىغانلىقىنى بىلدۈردى.

رۇسىيەمۇ مەش ۋە قىشلىق چېدىرلاردىن تەركىب تاپقان 36 توننا ئىنسانپەرۋەرلىك ياردەم ئەشياسىنى تۈركىيەگە ئەۋەتتى. خەۋەر قىلىنىشىچە، رۇسىيەدىكى ئەڭ چوڭ نېفىت خىمىيە سانائىتى شىركىتى — SIBUR ، تۈركىيەدىكى يەر تەۋرەشنىڭ تەسىرىگە ئۇچرىغان پۇقرالارغا 1 مىليون دوللار ئىئانە قىلىدىكەن.

مىسىردا ياشايدىغان تۈركىيەلىك سودا – سانائەتچىلەر، يەر تەۋرەشنىڭ زەربىسىگە ئۇچرىغان رايونلارغا 5.5 توننا ئىنسانپەرۋەرلىك ياردىمى ئەۋەتتى.

ئىراق تۈركمەنلىرىمۇ يەر تەۋرەشنىڭ زەربىسىگە ئۇچرىغۇچىلارغا ئىككى يۈك ماشىنىسى تۇرمۇش بۇيۇملىرىنى ئىئانە قىلدى.

ئافغانىستاننىڭ ھىرات ۋىلايىتىدىكى سودا – سانائەتچىلەر، ئاپەتنىڭ زەربىسىگە ئۇچرىغانلارغا 56 مىڭ 500 دوللار نەق پۇل ئىئانە قىلدى.

ئىلگىرى ئىزدەش-قۇتقۇزۇش ئەترىتى ۋە ياردەم ماتېرىياللىرىنى ئەۋەتكەن ئەزەربەيجان، ئادىياماندا 1000 كونتېينېرلىق شەھەر قۇرىدۇ.

تۈركىيەنىڭ باكۇدا تۇرۇشلۇق باش ئەلچىسى جاھىت باغچى، قاھرامانماراش مەركەزلىك يەر تەۋرەشلەردىن كېيىن، ئەزەربەيجاننىڭ تۈركىيەگە 1541 توننا ئىنسانپەرۋەرلىك ياردىمى ئەۋەتىلگەنلىكىنى ئېلان قىلدى.

پارس قولتۇقى دۆلەتلىرى سەئۇدى ئەرەبىستان، قاتار، ئەرەب بىرلەشمە خەلىپىلىكى، كۇۋەيت، بەھرەين ۋە ئوماندىكى ھۆكۈمەت ئورگانلىرى ۋە خەير-ساخاۋەت تەشكىلاتلىرىنىڭ ياردەم توپلاش پائالىيەتلىرىدە توپلانغان پۇلنىڭ مىقدارى 370 مىليون دوللاردىن ئېشىپ كەتتى.

بوسنىيە-گېرتسېگوۋىنا ۋە سېربىيە يەر تەۋرەشنىڭ زەربىسىگە ئۇچرىغۇچىلار ئۈچۈن ئەڭ زۆرۈر ماتېرىياللار دەپ قارىلىۋاتقان ئىسسىتقۇچ ۋە گېنېراتورلار يۈكلەنگەن يۈك ماشىنىلىرىنى تۈركىيەگە يولغا سالدى.

قاراتاغلىقلارنىڭ يەر تەۋرەشنىڭ زەربىسىگە ئۇچرىغۇچىلارغا قىلغان ئىئانىسىنىڭ 200 مىڭ ياۋروغا يېقىنلىشىپ قالغانلىقى بىلدۈرۈلدى.

جەنۇبىي ئافرىقىلىقلار تۈركىيەدىكى يەر تەۋرەشنىڭ زەربىسىگە ئۇچرىغۇچىلارغا ياردەم بېرىش ئۈچۈن سەپەرۋەر بولدى. يەر تەۋرەش رايونىغا ئىئانە قىلىنغان نۇرغۇن چېدىر، ئىسسىتقۇچ، ئۇخلاش خالتىسى، ئەدىيال، گېنېراتور، ساغلاملىق بۇيۇملىرى ۋە قىشلىق كىيىملەر تۈركىيە ھاۋا يوللىرى شىركىتى ئايروپىلانى بىلەن قەرەللىك ھالدا تۈركىيەگە توشۇلىدۇ.

6 – فېۋرالدا مەيدانغا كېلىپ، 10 ۋىلايەتكە تەسىر كۆرسەتكەن 7.7 ۋە 7.6 بال چوڭلۇقىدىكى «ئەسىرنىڭ ئاپىتى» ناملىق يەر تەۋرەشلەردە مىڭلارچە كىشى قازا قىلدى.