aqar «zeper küni» ni tebriklesh murasimigha qatnashti

türkiye awazi radiyosi xewiri: dölet mudapie ministiri xulusi aqar, bash ishtab bashliqi général yashar güler, quruqluq armiye qomandani général musa awsewer, déngiz armiye qomandani admiral adnan özbal, hawa armiyesi qomandani général hesen küchüaqyüz we muawin dölet mudapie ministiri alpaslan qawaqlioghlu qatarliqlar bilen birlikte, ezerbeyjanning enqere elchixanisi uyushturghan  «8 – noyabir zepe küni» ni tebriklesh murasimigha qatnashti.

aqar, hörmette turulghandin kéyin, türkiye we ezerbeyjan dölet marshlirining oqulushi bilen bashlanghan murasimda qilghan sözide, aldi bilen, ezerbeyjan armiyesining mislisiz zepirini tebriklidi, andin, ikki dölet otturisida dostluqtinmu halqighan qérindashliq rishte – alaqilirining barliqini, hemkarliqning barliq sahelerde barghanséri yüksek sewiyege yetken halda dawamlishiwatqanliqini tekitlep mundaq dédi: «buning netijiside, peqet ezerbeyjan bilen türkiyeningla emes, pütkül rayon döletliriningmu bixeter hem parawanliq ichide yashash pursitige érishidighanliqini bilimiz, hemde shundaq bolushigha tilekdashmiz,. hazirghiche bolghinidek, buningdin kéyinmu ezerbeyjanliq qérindashlirimizning heqqani dawalirida ularni qollashni dawamlashturimiz, buningdin héchkim qilche gumanlanmisun. bu mesililerni hemmila yerde munasiwetlik tereplerge tekrar – tekrar otturigha qoyduq, qoyuwatimiz, buningdin kéyinmu shundaq qilimiz.»

ikki dölet armiyeliri otturisidiki herbiy telim - terbiye we hemkarliqning üzlüksiz dawamliishiwatqanliqini qeyt qilghan aqar, mundaq dep körsetti: «türkiye armiyesi bilen rusiye armiyesining ortaq merkez paaliyetlirimu qoyuq shekilde dawamlashmaqta, bizning nishanimiz, urush toxtitishning izchilliqi we buning netijiside rayonda muqimliq ornitilishidur. derweqe, bu muqimliq peqet ezerbeyjan bilen türkiye üchünla kéreklik emestur. eger erméniye, hörmetlik ilham eliyéwning we hörmetlik jumhur reisimizning tinchliq nishanini chüshinip yétip, bu nishan boyiche heriket qilsa, erméniyening hem bixeterlik hem parawanliq jehettin paydigha érishidighanliqini bilimiz, hemme terepningmu bu ölmes heqiqetni chüshinip yétishini ümid qilimiz, bu nuqtida bizning istiratégiyelik nishanimizning dairisi nahayiti keng bolup, zörür tépilghanda, 6 tereplik yighinlarni uyushturush arqiliq pütkül kawkaz rayonining bixeterliki we parawanliqi üchün nahayiti muhim qedemlerni tashlashqa bolidighanliqi hemmimizge ayan.»

atatürkning «ezerbeyjanning derd – elemliri bizningmu derd – elemlirimiz, xushalliqi bizningmu xushalliqimizdur» dégen sözi bilen heyder eliyéwning «türkiye bilen ezerbeyjan bir millet, ikki dölettur» dégen sözini xatirilitip ötken aqar, türkiye bilen ezerbeyjanning ortaq tarixi we qimmet ölchemliri asasida, ghem – qayghudimu, xushalliqtimu bille bolghanliqini tekitlep mundaq dédi: «ezerbeyjanliq qérindashlirimiz <boldi bes> dep 44 kün ichide mislisiz zeper qazandi, hemde öz zéminlirini erméniyening ishghaliyitidin azad qildi, buning netijiside, türklerning qudritini pütkül jahangha namayen qildi, jümlidin, hem ezerbeyjanning hem türkiyening wetini we öz zéminini qoghdashta héchnémidin ayanmaydighanliqini pütkül jahan ehli tonup yetti.»