ئەردوغان: تۈرك مىللىتى بۈگۈنمۇ ۋەتىنى، ئىستىقلالى ۋە ئىستىقبالى ئۈچۈن جان پىدا قىلىشقا تەييار

تۈركىيە ئاۋازى رادىيوسى خەۋىرى: جۇمھۇر رەئىس رەجەپ تاييىپ ئەردوغان 30 – ئاۋغۇست زەپەر بايرىمى مۇناسىۋىتى بىلەن ئېلان قىلغان تەبرىكنامىسىدا، تۈرك مىللىتىنىڭ شانلىق تارىخىنىڭ ئالتۇن ھالقىلىرىدىن بىرسى بولغان 30 – ئاۋغۇست زەپەر بايرىمىنىڭ 97 – خاتىرە يىلىنى تەبرىكلەيدىغانلىقىنى تەكىتلەپ، بۈيۈك مىللەت مەجلىسى ( پارلامېنتى) نىڭ ھۆرمەتلىك ئەزالىرى ۋە قەھرىمان تۈرك ئارمىيەسىنىڭ بارلىق ئەسكەرلىرى بىلەن بىرلىكتە مىللەتكە بۇ زەپەرنى ھەدىيە قىلغان مۇستەقىللىق ئۇرۇشىنىڭ باش قوماندانى غازى مۇستاپا كامال ئاتاتۈركنى بۇ بۈيۈك زەپەرنىڭ 97 – خاتىرە يىلىدا مىننەتدارلىق بىلەن ئەسلەپ ئۆتتى.

ئەردوغان تۈركىيەدىكى، شىمالىي قىبرىس تۈرك جۇمھۇرىيىتىدىكى ۋە دۇنيانىڭ ھەممىلا يېرىدىكى تۈرك خەلقىنىڭ ھەر بىر ئەزاسىنىڭ 30 – ئاۋغۇست زەپەر بايرىمىنى تەبرىكلەيدىغانلىقىنى بىلدۈردى.

ئەردوغان مۇنداق دېدى:

«30 – ئاۋغۇستتا قولغا كەلتۈرۈلگەن بۇ كاتتا زەپەر بىلەن تەڭ، مىللىتىمىز ئۆزىگە راۋا كۆرۈلگەن ئاسارەت كۆينىكىنى يىرتىپ تاشلاپ، مەيلى قانداق بەدەل تالەشتىن قەتئىي نەزەر، مۇستەقىللىقتا ھەرگىز مۇرەسسە قىلمايدىغانلىقىنى پۈتۈن دۇنياغا جاكالىدى. ئاخىرقى دۆلىتىمىز تۈركىيە جۇمھۇرىيىتىنىڭ خۇش خەۋەرچىسى بولغان بۇ كاتتا زەپەر ئەسلىدە تارىختىن ئۆچۈرۈپ تاشلانماقچى بولغان تۈرك مىللىتىنىڭ قايتىدىن جانلىنىشىنىڭ نامىدۇر»

ئەردوغان بۈگۈنكى كۈندە سۈرىيەنىڭ شىمالىدا، ئىراقتا ۋە شەرقىي ئاقدېڭىزدا تۈركىيەگە قارشى قۇرۇلغان بارلىق توزاقلارنى بۇزۇپ تاشلاشتا قەتئىي ئىرادىگە ئىگە ئىكەنلىكىنى تەكىتلەپ، تۈرك مىللىتىنىڭ ۋە قىبرىس تۈركلىرىنىڭ ھەق – ھوقۇقىنىڭ تالان – تاراج قىلىنىشىغا ھەرگىز يول قويمايدىغانلىقىنى ئېيتتى.