türkiye amérikaning «F-35» qararigha naraziliq bildürdi

türkiye awazi radiyosi xewiri: türkiye tashqi ishlar ministirliqi amérikaning «F-35» qararigha naraziliq bildürüp bayanat élan qildi. ministirliq bu heqte élan qilghan bayanatida, amérika hökümitining türkiyeni «F-35» pirogrammisidin chiqiriwétishining héchqandaq yolluq sewebke tayanmaydighanliqini eskertip: «amérikani istratégiyelik munasiwetlirimizde yaxshilighili bolmaydighan zidilerni peyda qilidighan bu xataliqidin yénishqa dewet qilimiz» dédi.

bayanatta, aqsaray we amérika dölet mudapie ministirliqining rusiyedin «S-400» hawa mudapie sistémisi sétiwalghanliqi üchün türkiyening «F-35» pirogrammisidin chiqiriliwétilidighanliqini élan qilghanliqi xatirilitildi.

«bu bir tereplimilik halda bésilghan qedem, ittipaqliq rohigha uyghun bolmayla qalmastin, belki héchqandaq yolluq sewebi yoq» déyilgen bayanatta, töwendiki ibarilergimu orun ajritildi:

« F-35pirogrammisining asasliq shérikliridin béri bolghan türkiyening pirogrammining sirtida qaldurulushi, adilliq emes. S-400 sistémisining F-35 lerge tesir körsitidighanliqi toghrisidiki qarashlarmu küchke ige emes. bu mesilide natomu ishtirak qilidighan tekshürüsh guruppisi qurush teklipimizning nezerge élinmasliqi, amérika tereptiki bir tereplimilik we mesilini yaxshi niyet bilen özining yolida hel qilish iradisining kemchillikini eng roshen halda körsitip béridu.»

amérikaning türkiye bilen bolghan dostluqigha ehmiyet béridighanliqini peqet sözlep qoyush bilenla emes, belki herikiti bilen, bolupmu térrorluq teshkilatliri daésh, p k k|p y d|y p g we fethullahchi térrorluq teshkilatlirigha qarshi küreshtimu körsitishi kérekliki alahide tekitlengen bayanatta, munular qeyt qilindi:

«jumhur reis rejep tayyip erdoghan bilen pirézidént donald tramp ötken ay osakada ötküzülgenG-20 yighinida körüshkende otturigha qoyghan ortaq qarashqa her sewiyede sadiq bolush, bu nuqtidin éytqanda, intayin muhim ehmiyetke ige. amérikani istratégiyelik munasiwetlirimizde yaxshilighili bolmaydighan zidilerni peyda qilidighan bu xataliqidin yénishqa dewet qilimiz.»

amérika hökümiti «S-400» sewebidin türkiyening «F-35» pirogrammisi ichide bolmaydighanliqini bildürüp élan qilghan bayanatida: «amérika hazirmu türkiye bilen bolghan istratégiyelik munasiwetlirige intayin ehmiyet béridu. nato ittipaqdashliri bolush süpitimiz bilen munasiwetlirimiz köp tereplimilikke ige bolup, F-35 lergila baghliq emes» dégen idi.