تۈرك قىزىلئاي ساخاۋەت ئورگىنى يەمەن خەلقىگە قىلدى

تۈركىيە ئاۋازى رادىيوسى خەۋىرى: تۈرك قىزىلئاي ساخاۋەت ئورگىنى يەمەننىڭ مارىب ۋە ئۇبيە شەھەرلىرىدىكى مۇساپىرلارغا 2400 يېشىك يېمەك-ئىچمەك ياردەم قىلدى.

تۈرك قىزىلئاي ساخاۋەت ئورگىنىنىڭ يەمەندىكى ۋەكىلى مۇھەممەد ئەل ھاممادى، تۈرك قىزىلئاي ساخاۋەت ئورگىنى خادىملىرىنىڭ يەمەندىكى مۇساپىرلارغا يېمەك-ئىچمەك تارقىتىپ بەرگەنلىكىنى ئېيتتى.

يەمەندىكى قىزىلئاي ساخاۋەت ئورگىنى ھەيئىتى باشلىقى مۇستافا ئايدىن، ئۆتكەن چارشەنبە كۈنى 11مىڭ يېشىك يېمەك-ئىچمەكنى تارقىتىش خىزمىتىنىڭ  مارىب شەھىرىدىن باشلىغانلىقىنى، يەمەنلىكلەرگە تەخمىنەن 440 توننىلىق ياردەم بۇيۇمىنىڭ 30-ئاپرېلغىچە تارقىتىلىدىغانلىقىنى بىلدۈرگەنىدى.

تۈركىيە بەزى ئاممىۋى تەشكىلاتلارنىڭ  ۋاستىسى ئارقىلىق يەمەندىكى ئىچكى ئۇرۇش تۈپەيلى يۇرت-ماكانلىرىدىن ئايرىلىپ قالغان مۇساپىر ۋە نامرات ئائىلىلەرگە ياردەم قىلىپ كەلمەكتە.

ئۇزۇندىن بۇيان سىياسىي مۇقىمسىزلىققا سەھنە بولۇپ كېلىۋاتقان يەمەندە،شىئە ھۇسىي كۈچلىرى بىلەن ھۆكۈمەت ئارمىيەسى توقۇنۇشماقتا.

شىئە ھۇسىي كۈچلىرى 2014-يىلى سېنتەبىردىن بۇيان پايتەخت سەنئا قاتارلىق بەزى جايلارنى تىزگىنى ئاستىدا تۇتۇپ كېلىۋاتقان بولسا، سەئۇدى ئەرەبىستان باشچىلىقىدىكى خەلقئارا ئىتتىپاقداش قىسىملىرى 2015-يىلى مارت ئېيىدىن بۇيان شىئە ھۇسىي كۈچلىرىگە قارشى ھۆكۈمەتنى قوللاپ كەلمەكتە.