erdoghan: «firat deryasi» ning sherqide weziyetni tinjitimiz
jumhur reis rejep tayyip erdoghan «firat deryasi» ning sherqiy qismidiki rayonlarda weziyetni tinjitish, muqimliq hem bixeterlik ornitish iradilirining qetiylikini éytti.
türkiye awazi radiyosi xewiri: erdoghan islam hemkarliq teshkilatigha eza döletler we közetküchi döletlerning asasiy qanun we aliy sot mehkimilirining istanbuldiki dolmabahche sariyida ötküzülgen tunji nöwetlik edliye yighinida qilghan sözide, mundaq dédi: «tel rifattin afrin rayonida wezipe ötewatqan qisimlirigha qilinghan xainlarche hujum, bizning <firat deryasi> ning shimaliy qismigha herbiy heriket élip bérish toghruluq chiqarghan qararimizning intayin toghra ikenlikini ispatlaydu. amérika qoshma ishtatlirigha shundaq agahlandurushta bolimenki, eger munbich rayoni térrorchi lardin tazilanmisa, biz u yerge kirip tazilaymiz. beziler munbich hékayiliri bilen bizning diqqitimizni bashqa yaqqa buruwétishke urunuwatidu, emma ular shuni bilishi kérekki, süriyede tashawatqan qedemlirimiz arqiliq biz özimizning bixeterlikinila emes, pütkül islam ümmitining we barliq insaniyetning izzet – hörmitini qoghdawatimiz.»
türkiyening «firat deryasi» ning sherqiy qismidiki térrorchilarning uwisigha mudaxile qilish mesiliside tolimu kéchikekenlikini éytqan jumhur reis erdoghan, buningdin kéyin bir künmu kéchikip qélishqa sewr – taqitining yoqluqini eskertish bilen bir waqitta, «firat deryasi» ning sherqiy qismidiki térrorchilarning asasliq makani hésablinidighan sinjar we qarajaq téghi rayonlirighimu tünügün kechte hawa hujumi élip bérilghanliqini tekitlep mundaq dédi: «dölitimizning süriye chégrasidiki rayonlirimizgha nisbeten tehdit teshkil qiliwatqan sinjar we mehmur rayonlirining étekliridiki qarajaq téghigha herbiy heriket élip barduq, buning dawami choqum kélidu.»
