«türkiye iraqta térrorchilarni bir – birlep tazilap, ghelibiséri algha ilgirilewatidu»
jumhur reis rejep tayyip erdoghan türkiyening térrorchilarning shimaliy iraqtiki uwilirini bitchit qilip, bir – birlep tazilap, qendildimu, sinjardimu ghelibiséri algha ilgirilewatqanliqini éytti.
türkiye awazi radiyosi xewiri: jumhur reis erdoghan «10 – noyabir mustapa kamal atatürkni xatirilesh küni» munasiwiti bilen «<beshtepe> yighin zali» da ötküzülgen murasimda qilghan sözide, türkiye xelqining herbiy isyan urunushlirigha, herbiy isyanchilargha, bashqa küchlerning türlük oyunlirigha qarimay hemishe öz iradisige sahib chiqqanliqini, bu arqiliq höküm we qarar chiqirish hoquqining özige teelluq ikenlikini pütkül jahangha namayen qilghanliqini eskertish bilen bir waqitta, türkiyening insanperwerlik yardemlerde milliy kirimge asasen dunya boyiche beshinchi orunda turidighanliqini tekitlep mundaq dédi: «emma bizning bu tirishchanliqlirimizgha bashqilar qandaq jawab qayturuwatidu? chégra liniyelirimizni boylap térrorchilar karidori shekillendürüp, bizning bu kürishimizge tosqunluq qilishqa urunuwatidu, qarimaqqa ular qendildiki p k k ni térrorluq teshkilati dep élan qilip, kattibashliri toghruluq uchur yetküzgüchilerge mukapat bérilidighanliqini élan qilip qoyghini bilen, emeliyette ularning heqiqiy niyiti bashqa, chünki ularning perde arqisidin mezkur térrorchilar bilen qandaq hemkarlishiwatqanliqi bizge besh qoldek ayan.»
tünügün kéche haqqarining shemdilli nahiyesidiki bir oq - dora iskilatida yüz bergen partlash sewebidin 4 eskerning shéhit bolghanliqini, 20 dek eskerning yarilanghanliqini eskertken jumhur reis erdoghan, shéhitlargha allah taaladin rehmet, yarilanghanlargha shipaliq tilidi, shundaqla, térrorluq teshkilatliri bilen birlikte heriket qiliwatqlarning aqiwitining hemishe nadamet bilen netijilengenlikini, buni hemishe tekitlep kéliwatqanliqlirini, yéqinqi bir hepte ichide 15 térrorchining bir terep qilinghanliqini eskertip mundaq dédi: «shimaliy iraqtiki térrorchilarning uwilirini bitchit qilip, bir – birlep tazilap, qendildimu, sinjardimu ghelibiséri algha ilgirilewatimiz, <firat deryasi> ning sherqidiki qérindashlirimizning bölgünchi térrorluq teshkilatining tömür tapini astida échinishliq ingrawatqanliqini obdan bilimiz, xudayim buyrisa, yéqinda bu rayondiki mezlumlarghimu tinch we aramxuda yashiyalaydighan zémin hazirlap bérimiz.»
u yene, türkiyening gherbning ishiki aldida kütüsh bilen emes, eksiche, öz küchige tayanghan we özining milliy téxnologiyesini royapqa chiqarghandila, andin zamaniwi medeniyetler sewiyesige yételeydighanliqinimu sözlirige ilawe qildi.
jumhur reis erdoghan «birinchi dunya urushi» axirlashqanliqining 100 – yilliqi munasiwiti bilen ötküzülidighan «parizh tinchliq munbiri yighini» ghaqatnishish üchün firansiyege qarap yolgha chiqish harpisida élan qilghan bayanatidimu, haqqarida oq - dora iskilatida yüz bergen partlashta hayatidin ayrilghan eskerler sanining 7 ge yetkenlikini, 25 eskerning yarilanghanliqini qeyt qildi.
