türkiyening qattiq tirishchanliqi netijiside idlibte insaniy tiragédiyening aldi élindi

türkiye awazi radiyosi xewiri: yéqinqi 10 kün ichide ikki qétim körüshken jumhur reis rejep tayyip erdoghan bilen rusiye pirézidénti wladimir putin, süriyening idlib rayonida qorallardin tazilanghan rayon tesis qilish mesiliside kélishti. ikki rehber sochida ayrim we heyetler ara ötküzülgen uchrishishtin kéyin, ortaq axbarat élan qilish yighini ötküzdi.

axbarat élan qilish yighinida deslepte söz qilghan pirézidént putin, jumhur reis rejep tayyip erdoghan bilen sodini asas qilghan halda ikki terep munasiwetlirini muzakire qilghanliqlirini bildürdi. u sodida milliy pul birliklirini ishlitishni tekitlep, ortaq énérgiye layihelirining dawamlishidighanliqini qeyt qildi.

u medeniyet we sayahet saheliriningmu muzakire qilinghanliqini, idlibning küntertipning merkiziy nuqtisi bolghanliqini we bu heqte muhim pikir birlikining hasil qilinghanliqini éytti. u süriyediki rusiye bazilirigha hujum qilish xetiridin endishe qiliwatqanliqlirini eskertti we sözini mundaq dawamlashturdi:

«idlibte öktichi guruppilarning éghir tipliq qoralliri bilen 20-15 kilométirliq qoralsiz rayon tesis qilish üchün chékinishini qararlashturduq.»

jumhur reis rejep tayyip erdoghan sözini rusiyeni ziyaret qilghanliqidin memnunluq hés qilghanliqini bildürüsh bilen bashlidi we ikki dölet hemkarliqining her sahede, ortaq siyasiy irade asasida ilgiriligenlikini tekitlidi.

u putin bilen süriye mesiliside özara pikir almashturghanliqlirini bildürüp: «idlibte 15-öktebirdin bashlap, qorallardin tazilanghan bixeter rayon tesis qilip, öktichiler we beshshar esed hakimiyitining turuwatqan rayonlirida qélishi toghrisida kélishtuq» dédi.

u qorallardin tazilanghan rayon xewpsizlikining türkiye bilen rusiye qisimlirining maslishishi astida kapaletke ige qilinidighanliqini eskertti we buning bilen idlibte insaniy tiragédiye yüz bérishining aldi élinghanliqini bildürdi.

u süriye asasiy qanun komitétining xizmetlirini axirlashturushidin kéyin ötküzülidighan saylamlarda, süriye xelqining öz tallishini otturigha qoyushini ümid qilidighanliqlirini qeyt qildi. u mundaq dédi:

«térrorist guruppilar peqet idlibtila emes. eng chong tehdit firat deryasining sherqide heriket qiliwatqan bölgünchi térroluq teshkilati p k k ning süriyediki gumashtisi p y d dur.»

putin bilen erdoghan 7-séntebir iran paytexti téhranda pirézidént hesen ruhanining sahibxanliqida ötküzülgen üch terep yighinida körüshken idi.