türkiye, alaqidar tereplerni idlibtiki barliq herbiy heriketlerge xatime bérishke chaqirdi

türkiye awazi radiyosi xewiri: feridun sinirlioghlu, rusiyening telipige asasen chaqirilghan b d t  xewpsizlik kéngishi yighinida, jumhur reis rejep tayyip erdoghan, rusiye pirézidénti wiladimir putin we iran pirézidénti hesen ruhanining jüme küni téhranda ötküzgen bashliqlar yighinining netijisi toghrisida eza döletlerge melumat berdi.

astana söhbetlirining süriyede zorawanliqni azaytip, siyasiy musapining süritini ashurush meqsitide ötküzülgenlikini eslitip ötken sinirlioghlu, téhran yighinidimu idlib mesilisining aldinqi pilandin orun alghanliqini we jumhur reis erdoghanning téhranda urush toxtitish élan qilishqa chaqirghanliqini qeyt qilghandin kéyin, yene bir qétim alaqidar tereplerni idlibtiki barliq herbiy heriketlerge xatime bérip, urush toxtitish élan qilishqa chaqirdi. u mundaq dédi: «urush toxtitish chaqiriqimiz barliq herbiy heriketlerni öz ichige alidu we türkiye bu yönilishtiki xizmetlirini dawamlashturidu. xelqara jemiyetnimu jarangliq we aktip halette tirishchanliqlirimizni qollap – quwwetleshke chaqirimiz» dédi.

feridun sinirlioghlu sözini dawamlashturup, «idlibqa qilinidighan herbiy heriketler shubhisizki insaniy pajie yaritidu, musapirlar éqinini bashlitidu, türkiye, yawropa we uningdin halqighan rayonlarda bixeterlik tehditliri peyda qilidu» dep agahlandurdi.

türkiyening 3 yérim milyon kishi bilen dunyada eng köp musapirgha sahibxanliq qiliwatqan dölet ikenlikini xatirilitip ötken sinirlioghlu, «biraq shuning bilenmu yüzlisheyli؛ biz xéli burunla qurbimizning yuqiri siziqigha yétip bolduq» dédi.

idlibtiki milyonlarche bigunah insanning hayatining xewpke ittirilishige yol qoyulmasliqi lazimliqini tekitligen sinirlioghlu, «bu xelqara jemiyetning ortaq wezipisi. nöwette idlibta bizni endishe ichide közitiwatqanlar térrorchi emes, 3 yérim milyon puqra we buning 1 milyoni balilardur. ularni ümidsizlikke duchar qilsaq bolmaydu» dégenlerni qeyt qildi.