erdoghan wal sitrit jurnalda maqale élan qilip, xelqara jemiyetni idlib toghrisida agahlandurdi

jumhur reis rejep tayyip erdoghan, süriyening idlib shehirige qilinidighan hujumning, türkiye, yawropaning qalghan jayliri we bashqa rayonlarda éghir insaniy we xewpsizlik tehditlirini peyda qilidighanliqini éytti.

erdoghan wal sitrit jurnalda maqale élan qilip, xelqara jemiyetni idlib toghrisida agahlandurdi

türkiye awazi radiyosi xewiri: jumhur reis erdoghan amérikida chiqidighan wal sitrit jurnalda élan qilinghan maqaliside, «idlibqa hujum qilishning alametliri körünüwatqan mushundaq bir peytte xelqara jemiyet mesuliyitini tonup yétishi lazim. passip turushning bedili éghir bolidu. süriye xelqini beshshar esedning merhemitige tashlap qoysaq bolmaydu» dégen ibarilerge orun berdi.

erdoghan,  wal sitrit jurnal gézitige yazghan idlib shehirining nöwettiki weziyiti we türkiyening bu mesilige munasiwetlik pozitsiyesi toghrisidiki «dunya esedni toxtitishi lazim» serlewhilik maqaliside, idlib mesiliside türkiyening qolidin kelgen ishlarni yetküche qilghanliqini, beshshar esed hakimiyitining yéqinqi 7 yildin buyan süriyede qiliwatqan qilmishlirining ochuq – ashkara ikenlikini qeyt qildi.

erdoghan, esed hakimiyitining yéqinlishiwatqan idlib hujumi toghrisida toxtilip, «hakimiyetning idlibke hujum qilishtiki gherizi, heqiqiy we paal rewishte térrorizmgha qarshi küresh seperwerliki qozghash emes, qara – quyuq halda öktichilerni yoqitip tashlashtin ibarettur» dédi.

jumhur reis erdoghan maqaliside yene, «idlib, köwrüktin ilgiriki axirqi chiqish éghizidur. eger yawropa we amérika qoshma ishtatliri hazir heriketke ötüshte meghlubiyetke uchrisa, peqet bigunah süriyeliklerla emes, pütkül dunya bedilini töleshke mejbur bolup qalidu. türkiye yénidiki qirghinchiliqni toxtitish üchün pütün küchi bilen qolidin kelgen ishlarni qildi» dégenlerni tekitlidi.

türkiyening 3 yérim milyondin artuq süriyelikke sahibxanliq qilghanliqigha isharet qilghan erdoghan, «oxshash waqitta yénimizdila paaliyet élip bériwatqan térrorluq teshkilatliriningmu hujum nishani bolduq؛ atalmish islam döliti (daésh) we (bölgünchi térrorluq teshkilati) p k k. ne insaniy yardemlerning éghir bedili, ne xewpsizlik endishliri qetiy pozitsiyemizni ajizlitalmidi» dep yazdi.

idlib mesilisi toghrisida amérika qoshma ishtatlirigha xitab qilghan erdoghan, moskwa we téhranghimu chaqiriq qildi. u sözini dawamlashturup, «(diqqitini) ximiyelik qoral hujumilirigha merkezleshtürgen amérika qoshma ishtatlirining, ölükler arisida xalighanche derijige qarashni ret qilishi lazim. ammiwiy qorallar téximu köp ölümning jawabkaridur, lékin yénimizdiki qetliamni toxtitish mejburiyiti peqet gherbningla yelkiside emes. astana musapisidiki shériklirimiz rusiye bilen iranningmu bu insaniy pajieni toxtitish mejburiyiti bar» dégenlerni qeyt qildi.

erdoghan maqaliside yene, «esed hakimiyiti öz hujumlirini térrorizmgha qarshi küresh zéminda qanunlashturushqa urunmaqta. bu nuqtida xatalashmanglar؛ térrorizmgha qarshi küreshte türkiyedinmu bekrek teqdirleshke tégishlik héchbir bir dölet yoqtur. beshshar esedning hel qilish charisi xatadur. bigunah kishiler térrorizmgha qarshi küresh nami astida qurban qilinmasliqi kérek. bu, peqet ashqunluq we térrorizmgha yéngi imkaniyetlerni yaritip béridu. daéshning otturigha chiqishi süriyede yüz bergen ishlarning sewebi emes mehsuli idi» dégen ibarilerge orun ajratti.

idlibta heyeti tehrirushshamgha oxshash térrorluq teshkilatliri aktip heriket qiliwatqan jaylarning barliqigha, biraq bu unsurlarning rayon nopusining peqet bir qisminila teshkil qilidighanliqigha isharet qilghan erdoghan, térrorizmgha qarshi küresh qilghanda, puqralargha ziyan yetküzmeslikni kapaletke ige qilishning mumkinlikini, türkiyening daésh we p k k gha qarshi kürishide buning ülgilirining namayan bolghanliqini eskertip ötti.



مۇناسىۋەتلىك خەۋەرلەر