erdoghan: mesum insanlarning öltürülüshige qarap turalmaymiz

türkiye awazi radiyosi xewiri: erdoghan tünügün iranning paytexti téhranda chaqirilghan türkiye – rusiye – iran üch terep aliy derijilik rehberler yighini toghruluq ammiwi ortaqlishish tor béti Twitter sehipiside rus, ingiliz we ereb tillirida élan qilghan bayanatida, türkiyening bashtin tartipla süriyede éqiwatqan qanni toxtitish üchün izchil  küresh qilip kelgenlikini, qilche ayrimchiliq qilmastin süriyelik qérindashlirini baghrigha basqanliqini, tünügünkige oxshashla bügünmu héchbir süriyelikning burnining qanishinimu xalimaydighanliqini eskertti. shuning bilen bir waqitta, téhranda chaqirilghan yighinda, süriyelik puqralarning bixeterlikini depsende qiliwatqan hakimiyetlerning pozitsiyelirining, térrorchilarning dépigha ussul oynashtin bashqa héchqandaq payda élip kélelmeydighanliqini tekitlep mundaq dédi: «beshshar esed hakimiyitining menpeetlirini dep on minglarche mesum insanning öltürülüshige hergizmu qarap turalmaymiz. idlib mesilisi yéngi derd – elemlerge, yéngi sürkilishlerge, yéngi qiyinchiliqlargha yol achmastin burun, astana kélishimige riaye qilinghan asasta hel qilinishi kérek. derweqe, astanada tüzgen kélishimning pirinsiplirigha emel qilish süriye kirizisini hel qilish jehettin nahayiti zor ehmiyetke ige. térrorizmgha qarshi  küreshni bahane qilip, sahede köz boyamchiliq qilmasliq, süriyening zémin pütünlükige, qoshna döletlerning bixeterlikige ziyan yetküzüsh meqsitide yaman gherezde bolmasliq lazim.»

jumhur reis erdoghan türkiyening 3 yérim milyondin artuq süriyelikke sahibxaniliq qiliwatqan bir dölet bolush süpiti bilen, köchmenlerning öz raziliqi bilen hemde bixeter halda öz dölitige qaytishini ishqa ashurush, süriye kirizisini barliq terepler bilen  üzül – késil hel qilish yolida dawamliq tirishchanliq körsitiwatqanliqini, buningdin kéyinmu shundaq qilidighanliqinimu sözlirige ilawe qildi.