19.08.2022
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹höriyet› géziti», «erdoghan <yéngi chérnobil weqesige duch kélishni xalimaymiz> dédi» serlewhilik xewiride, töwendiki uchurlarni oqurmenlirining diqqitige sundi:
dölitimiz (türkiye jumhuriyiti) jumhur reisi rejep tayyip erdoghan, ukraina pirézidénti wladimir zéléniski we birleshken döletler teshkilati bash katipi antonyo gutérés, ukrainaning lwiw shehiride ötküzülgen üch tereplik bashliqlar uchrishishidin kéyin bayanat élan qildi. üch tereplik bashliqlar uchrishishining asasliq nishanining, qandaq qilghanda urushqa xatime bergili bolidighanliqi mesilisi ikenlikini éytqan erdoghan, mundaq dep körsetti: «yadro éléktir istansisidiki toqunushlardin endishe qiliwatimiz. yéngi chérnobil weqesige duch kélishni xalimaymiz. ukrainaning qayta qurup chiqilishigha tégishlik yardem bérimiz.»
«‹sabah› géziti», «jumhur reis erdoghan söhbet ötküzüshning zörürlükini tekitlidi» serlewhilik xewiride, töwendiki uchurlargha orun ajratti:
dölitimiz (türkiye jumhuriyiti) jumhur reisi rejep tayyip erdoghan üch tereplik bashliqlar uchrishishidin kéyin bergen bayanatida, mundaq dédi: «eslide kirizisni hel qilishning birdinbir yoli, söhbet üstilide kirizisni eng qisqa we eng adil shekilde hel qilish charisini éniqlap chiqishtur.»
mart éyida istanbulda shekillengen paramétirlargha asasen söhbetlerni janlandurghili bolidighanliqigha ishinidighanliqini eskertken erdoghan, mundaq dédi: «biz bu nishangha yétish üchün her xil yardemlerni bérishke, tekrar qolaylashturghuchiliq we muressechilik rolimizni jari qildurushqa teyyarmiz.»
«‹weten› géziti», «ukraina portliridin 622 ming tonnidin artuq ashliq yötkeldi» serlewhilik xewiride, munu uchurlarni oqurmenlirining diqqitige sundi:
türkiye jumhuriyiti dölet mudapie ministirliqi, 1 – awghusttin buyan ukraina portliridin 622 ming tonnidin artuq ashliq yötkelgenlikini uqturdi.
«‹xewer türk› géziti», «antalyagha kelgen chet ellik sayahetchilerning sani 8 milyondin éship ketti» serlewhilik xewiride, munu uchurlargha orun ajratti:
déngizi, déngiz sahilliri, tebiiy menziriliri, tarixi we medeniyet bayliqliri bilen yilning 12 éyida sayahetchilerni kütüwalidighan antalyagha, bu yilning aldinqi 7 yérim éyida kelgen chet ellik sayahetchilerning sani 8 milyondin éship ketti.
«‹yéngi shepeq› géziti», «pütkül dunyaning diqqitini qozghighan türk» serlewhilik xewiride, munu uchurlarni oqurmenlirining diqqitige sundi:
2017-yili 24 saet ichide 13 döletni aylinip chiqip, «dunya jinnés rékorti qamusi» gha kirishke muweppeq bolghan ümid sabanji, yéngidin rékortni buzup tashlidi. sabanchi, nöwetchi yoluchilar ayropilanliri bilen 46 saet 23 minutta dunyani aylinip chiqti. shuning bilen, u, qisqa waqit ichide buni emelge ashurghan shexske aylandi.
