08.06.2022
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹höriyet› géziti», «ministir aqar süriyege qarita herbiy heriket élip bérish toghruluq signal berdi» serlewhilik xewiride, töwendiki melumatlarni oqurmenlirining diqqitige sundi:
dölet mudapie ministiri hulusi aqar, süriyening shimaligha qarita herbiy heriket élip bérishqa teyyar ikenliklirini tekitlep, «waqti kelgende heriketke ötülidu» dédi.
«‹sabah› géziti», «chawushoghlu girétsiyeni axirqi qétim agahlandurdi» serlewhilik xewiride, munu uchurlarni oqurmenlirining diqqitige sundi:
tashqi ishlar ministiri mewlüt chawushoghlu, ege déngizidiki qoralsiz salahiyitige ige arallargha qoshun orunlashturulush we qoral - yaragh yötkilish mesilisi heqqide toxtalghanda, mundaq dédi: «eger girétsiye dewaliridin waz kechmise, arallarning bixeterliki talash – tartish qozghaydu.»
u yene, arallarning igilik hoquqi toghrisida talash – tartishlarning bashlanghanliqinimu sözlirige ilawe qildi.
«‹weten› géziti», «bayanatchi qalin shimaliy atlantik ehdi teshkilati bash katipining kabént diréktori jénssén bilen körüshti» serlewhilik xewiride, jumhur reislik mehkimisi bayanatchisi ibrahim qalin bilen muawin tashqi ishlar ministiri sedat önalning, tünügün shimaliy atlantik ehdi teshkilati bash katipining kabént diréktori stiyan jénssén bilen paytext enqerede bir yerge jem bolghanliqini, uchrishishta, türkiyening shimaliy atlantik ehdi teshkilatigha qoshqan töhpiliri, shiwétsiye bilen finlandiyening shimaliy atlantik ehdi teshkilatigha ezaliq iltimasi basquchi we rusiye – ukraina urushigha munasiwetlik yéqinqi özgirishler heqqide muzakire élip bérilghanliqini xewer qildi.
«‹yéngi shepeq› géziti», «türkiyening chay ékisportidin 9.8 milyon dollarliq kirim qolgha kirgüzüldi» serlewhilik xewiride, töwendiki uchurlarni oqurmenlirining diqqitige sundi:
bu yil 1-aydin 5-ayghiche bolghan ariliqta türkiyening chay éksporti% 15 éship, 9 milyon 801 ming 535 dollargha yetti.
«‹star› géziti», «13 – nöwetlik xelqara TRT höjjetlik filim mukapatliri mukapat tarqitish murasimi bilen axirlashti» serlewhilik xewiride, töwendiki melumatlarni oqurmenlirining diqqitige sundi:
türkiye radiyo – téléwiziye bash idarisi (TRT) teripidin bu yil 13 – qétimliqi ötküzülgen «13 – nöwetlik xelqara TRT höjjetlik filim mukapatliri» mukapat tarqitish murasimi bilen axirlashti.
TRT bash mudiri mehmet zahid sobachi, dunyaning herqaysi jayliridin kelgen intayin qimmetlik höjjetlik filimlerge sahibxanliq qilghanliqlirini tekitlep mundaq dédi: «dölitimiz yer shariwi adalet üchün küresh qiliwatqan bir peytte, bizmu höjjetlik filimlirimiz arqiliq pütkül dunya tünügünmu, bügünmu duch kéliwatqan adaletsizliklerni namayen qiliwatimiz, hemde insanperwerlikni muhim orungha qoyuwatimiz.»
مۇناسىۋەتلىك خەۋەرلەر
20.05.2024
bügünki türkiye metbuatida orun alghan bezi muhim xewerlerning qisqiche mezmunliri töwendikiche:
