27.05.2022

türkiye awazi radiyosi: «xabertürk» géziti: «herbiy heriket milliy éhtiyajlarning teqezzasi» serlewhilik xewiride, dölet bixeterlik kéngishining jumhur reis rejep tayyip erdoghanning riyasetchilikide yighin chaqirghanliqini, yighindin kéyin élan qilinghan bayanatta: «jenub chégrayimizdiki herbiy heriketler dölet éhtiyajlirining teqezzasi. térrorluq teshkilatlirigha qarshi zerbe bérish heriketliri dawamlishidu» dégen ibarilerge orun bérilgenlikini yazdi.

«sabah» géziti: «türkiye ittipaqdashlirini térrorni qollimasliqqa chaqirdi» serlewhilik xewiride, türkiyening xelqara ittipaqlardiki hemkarliq rohi we mejburiyitini izchil ada qilip kelgenlikini, ittipaqdashliridinmu oxshash mesuliyet we semimiyetni ümid qilidighanliqini bildürgenlikini yazdi.

gézitning xewiride körsitilishiche, tünügün chaqirilghan dölet bixeterlik kéngishi bayanatida, térrorluqni qollash arqiliq xelqara qanungha xilapliq qilghan döletler, bu xil pozitsiyelirige xatime bérip, türkiyening bixeterlik jehettiki sezgürlükini oylishishqa chaqirilghan.

«weten» géziti: «stolténbérg, türkiyening térrorluqqa qarshi kürishi orunluq (dédi)» serlewhilik xewiride, shimaliy atlantik ehdi teshkilati — nato bash katipi yéns stolténbérgning: «héchkim térrorluq hujumliridin türkiyege oxshash ziyan tartmidi» déyish arqiliq, türkiyening térrorluqqa qarshi kürishining yolluq ikenlikini otturigha qoyghanliqi toghrisidiki uchurlargha orun berdi.

gézit yene, nato bash katipi stolténbérgning, türkiyening, shiwétsiye bilen finlandiyening natogha eza bolush iltimasigha qarita bezi teleplerni otturigha qoyushqa hoquqluq ikenlikini, bir ittipaqdash döletning qayghusi bolsa, uni hel qilishning zörür ikenlikini eskertkenlikini ilgiri sürdi.

«star» géziti: «chawushoghluning éniq agahlandurush bérip: biz heywe qilmaywatimiz (dédi)» serlewhilik xewiride, dölitimiz (türkiye jumhuriyiti) tashqi ishlar ministiri mewlüt chawushoghluning, girétsiyening xelqara belgilimilerge pisent qilmastin ege déngizidiki arallarni qorallandurushigha naraziliq bildürüp, (girétsiye) bundaq qilishtin waz  kechmigen teqdirde, igilik hoquqi munazirisining bashlinidighanliqini tilgha élip:  «biz heywe qilmaywatimiz. eger girétsiye buninggha emel qilmisa, biz bu mesilini téximu ilgiri nuqtigha chiqirimiz. girétsiyening qedemliri türkiyege xewp peyda qilishni meqset qilidu» dégenlikini oqurmenliri bilen ortaqlashti.

«hürriyet» géziti: «<téknofést (téxnologiye féstiwali) ezerbeyjan>  qizghinliq keypiyat ichide bashlandi» serlewhilik xewiride, dunyaning aldinqi qatardiki téxnilogiye féstiwallirining biri bolghan <téknofést>ning awiyatsiye, alem we téxnologiye féstiwalining ezerbeyjanning paytexti bakuda bashlanghanliqini, 120 ming kiwadrat métirliq rayonda 4 kün dawamliship, 50 ming ziyaretchini kütüwélishi texmin qiliniwatqan féstiwalda 5 ming ademning riqabetlishidighanliqini yazdi. 

gézitning xewiride körsitilishiche, féstiwalda dangqi dunyagha pur ketken türkiye uchquchisiz hawa apparatliri <bayraqtar> we <aqinji> bilen birlikte ayropilanlar, tik ucharlar we bronéwik aptomobillar körgezme qilinidiken.