13.05.2022

«‹weten› géziti», «türkiyening parizhdiki bash konsulxanisigha bomba hujumi qilindi» serlewhilik xewiride, firansiyening paytexti parizhdiki türkiyening bash konsulxanisigha yerlik usulda yasiwilinghan bomba bilen hujum qilinghanliqini, hujumda konsulxana binasining ziyangha uchrighanliqini, alaqidar menbeler hujumning jawabkarliqini bölgünchi térorluq teshkilati p k k  bilen chétishliqi bar teshkilatlarning  üstige alghanliqini bildürgenlikini yazdi.

«‹yéngi shepeq› géziti», «erdoghan: <tokyoda pexirlenduq, nöwet parizhda> dédi» serlewhilik xewiride, munu uchurlargha orun ajratti:

jumhur reis rejep tayyip erdoghan türkiyening 2020-yili tokyogha 87 tenheriketchi ewetkenlikini, tükiyening méyiplar olimpik tenheriket musabiqisi tarixida eng köp tenheriketchi yollighan dölet bolghanliqini bildürdi. türk tenheriketchilerning xelqaraliq chémpiyonluq musabiqisida nurghun médalgha érishkenlikini tekitligen erdoghan, «men 2024-yilliq parizh olimpik tenheriket musabiqisidimu hem tenheriketchiler sani, hem érishidighan médallirimiz jehettin yéngi rékort yaritidighanliqimizgha ishinimen» dédi.

«‹xeber türk› géziti», «türkiye puqraliqigha érishishning chéki östürüldi» serlewhilik xewiride, öy-mülük sétiwélish arqiliq türkiye puqraliqigha érishishning chéki 250 ming dollardin 400 ming dollargha chiqirilghan jumhur reislik qararnamisining resmiy gézitte élan qilinghanliqini, bu qararning bir aydin kéyin küchke ige bolidighanliqini, belgilimige kirgüzülgen yene bir özgertish bilen xususiy pinsiye sistémisigha 500 ming dollar yaki shuninggha teng chetel puli yatquzup qatnashqan we bu sistémida 3 yil turghan chetelliklerningmu türkiye puqraliqigha érisheleydighanliqini, bu yéngi qararning bügündin bashlap yolgha qoyulidighanliqini yazdi.

«‹star› géziti», «türkiye bilen ezerbeyjan otturisida dewr bölgüch leyihe» serlewhilik xewiride, munu uchurlargha orun ajratti:

qatnash we ul eslihe ministiri adil qara ismailoghlu türkiye bilen ezerbeyjan otturisidiki zegézor tömür yoli we tashyol liniyesining ishqa kirishtürülüshi bilen istanbuldin xitaygha tutishidighan yéngi bir karidorning ishqa ashqanliqini bildürdi. bu karidor asiya döletlirining erzan bahada yawropagha mal éksport qilishigha sharait yaritip béridu hemde türk dunyasini bir – birige téximu yéqinlashturidu.

«‹sabah› géziti», «chetellik oqughuchilar istanbul ayrodromigha heyran qaldi» serlewhilik xewiride, engliyening bérminham shehiridiki <bérminham uniwérsitéti inistituti>da awiatsiye we sayahet kespide oquwatqan oqughuchilarning oqush seylisi üchün istanbulni tillighanliqini, dunyaning oxshimighan döletliridin kelgen 60 oqughuchining istanbul ayrodromigha heyran qalghanliqini, latwiyelik méhman oqughuchi ayja busaning: «men bundaq mukemmel ayrodromni körüp baqmighan» dégenlikini yazdi.