11.05.2022

türkiye awazi radiyosi: «hürriyet» géziti: «türkiye bilen qazaqistan otturisida 15 türlük kélishim imzalandi» serlewhilik xewiride, qazaqistan pirézidénti qasim jömert tokayéwning paytext enqerede dölet ishliri ziyaritide bolghanliqi؛ ziyaret jeryanida türkiye bilen qazaqistan otturisida qatnash, mudapie sanaiti, herbiy axbarat, uchur téxnikisi, medeniyet, yéza - igilik, qatnash, soda, tamozhna, muhit, maarip, yashlar, alaqe we arxip qatarliq 15 sahe boyiche kélishim imzalanghanliqi toghrisidiki uchurlargha orun berdi.

«xabertürk» géziti: «erdoghanla rusiye - ukraina urushi türk döletliri teshkilatining ehmiyitini namayan qildi (dédi)» serlewhilik xewiride, jumhur reis rejep tayyip erdoghanning, rusiye - ukraina urushining türk döletliri teshkilati sépidiki ittipaqliq we hemkarliqning ehmiyitini yene bir qétim namayan qilip bergenlikini bildürüp, qazaqistan pirézidénti qasim jömert tokayéw bilen türkiye bilen qazaqistanning, türk döletliri teshkilati, birleshken döletler teshkilati, islam hemkarliq teshkilati we iqtisadiy hemkarliq teshkilati qatarliq supilardiki hemkarliqini dawamlashturush iradisini yene bir qétim tekitlep ötkenliklirini éytqanliqini oqurmenlirining diqqitige sundi.

«sabah» géziti: «türkiyening yéngi chégra éghizi: rize – artwin ayrodurumi» serlewhilik xewiride, rize – artwin ayrodurumining xelqaraliq kirish – chiqishlargha ochuq daimiy chégra éghizi qilip békitilgenlikini؛ ayrodurumning 14 – mayda jumhur reis rejep tayyip erdoghan bilen ezerbeyjan pirézidénti ilham eliyéw ishtirak qilidighan murasim arqiliq xizmetke kirishtürülidighanliqi toghrisidiki uchurlargha orun berdi.

«yéngi shepeq» géziti: «ezerbeyjanda téxnologiye féstiwali (bayrimi) tentenisi» serlewhilik xewiride, dunyaning eng chong awiyatsiye, alem boshluqi we téxnika bayrimi — téknoféstning 26 - maydin 29 - mayghiche ezerbeyjanning paytexti bakudiki xirustal zal we déngiz qirghiqi dölet baghchisida ötküzülidighanliqini, 4 kün dawamlishidighan féstiwalning ziyaretchilerge hayajanliq lehzilerni bexsh qilidighanliqini yazdi.

«star» géziti: «türkiyediki bor zapisi dunyaning ming yilliq éhtiyajini qanduralaydu» serlewhilik xewiride, eti kan bashqurush idarisi bashliqi, shundaqla bash mudiri serkan kelesherning, türkiyening dunya bor zapisining 73 pirsentige ige ikenlikini bayan qilip: «yalghuz türkiyela dunyani texminen ming yil boyiche bor bilen teminliyeleydu» dégenlikini yazdi.

gézitning xewiride körsitilishiche, bor kanliri kelgüsidiki énérgiye menbelirining biri dep qarilidiken.