09.05.2022

türkiye awazi radiyosi: «hürriyet» géziti: «erdoghan: armiyemiz chégra boylirida xataliqlargha yol qoymidi (dédi)» serlewhilik xewiride, jumhur reis rejep tayyip erdoghanning chégra mudapie liniyesidiki xizmetlerni közdin kechürgen dölet mudapie ministiri xulusi aqar bilen téléfonlashqanliqini yazdi.

gézitning xewiride körsitilishiche, erdoghan bixeterlik qisimlirigha téléfon arqiliq xitab qilip: «armiyemiz hazirghiche chégra boylirida azraqmu xataliqqa yol qoymidi. armiyemizning silerdin ibaret qedirlik ezalirini özüm we xelqimge wakaliten alqishlaymen. silerning bu tirishchanliqinglar tarix boyiche untulmaydu» dégen.

«weten» géziti: «türkiye shiwéyitsariyediki hujumni eyiblidi» serlewhilik xewiride, bölgünchi térrorluq teshkilati p k k terepdarlirining shiwéytsariyening basél shehiride ötküzülgen 23 - aprél xelqara balilar bayrimini tebriklesh paaliyiti jeryanida türkiye puqralirigha hujum qilghanliqini, türkiye jumhuriyiti tashqi ishlar ministirliqining bu hujumni qattiq eyiblep élan qilghan bayanatida: «bir térrorluq teshkilati we uning yandashlirining yawropaning kindikide bir balilar bayrimini zerbe obyékti qilghudek derijide peskeshlishishi, térrorluq teshkilatining rezil epti beshirisini xelqara jemiyetke yene bir qétim namayan qildi» dégen ibarilerge orun bérilgenlikini oqurmenliri bilen ortaqlashti.

«star» géziti: «eger türkiye yawropa ittipaqi ezasi bolghan bolsa idi, bu urushning aldi élinghan bolatti» serlewhilik xewiride, (türkiye jumhuriyiti) muawin tashqi ishlar ministiri, qoshumche yawropa ittipaqi ishliri mesuli bash elchi faruq qaymaqjining, türkiyening yawropa ittipaqigha eza bolushining üchinchi döletler üchünmu intayin paydiliq bolidighanliqini otturigha qoyup: «eger türkiye yawropa ittipaqi ezasi bolghan bolsa idi, ukrainada yüz bergen urushning nahayiti asanla aldi élinghan bolatti. chünki gherb üchün muhim bolghini tosqunluq qilish küchige ige bolushtur» dégen sözlirige orun berdi.

«yéngi shepeq» géziti: «yawropaliqlar yiraq sherqning ornigha türkiyeni tallimaqta» serlewhilik xewiride, istanbul soda uyushmisi reisi shekib awdagichning, ishlepchiqirish we zakaz jehettiki türkiyege bolghan qiziqishning kowidtin kéyinmu dawamlashqanliqini, yiraq sherqte bolupmu xitayda yuqumning qaytidin köpiyiwatqanliqini eskertip: «bu sewebtin yawropaliqlar zakaz üchün türkiyege oxshash bixeter bazarlargha yüzlinishni dawamlashturmaqta. türkiyening baha, süpet we teminlesh jehettiki ipadisi intayin yaxshi» dégenlikini yazdi.

«xabertürk» géziti: «yéza igilik éksporti aldinqi 4 ayda % 24 ashti» serlewhilik xewiride, türkiyening déhqanchiliq mehsulatliri éksportining bu yilning aldinqi 4 éyida bulturqining oxshash mezgilige sélishturghanda %24 éship, 11 milyard 127 milyon dollargha yetkenliki toghrisidiki uchurlargha orun berdi.

gézitning xewiride körsitilishiche, türkiyening déhqanchiliq éksporti aprélda bulturqining oxshash mezgilige sélishturghanda %17.6 éship, 2 milyard 765 milyon dollargha yetken.