25.04.2022

türkiye awazi radiyosi: «hörriyet» géziti: «chawushoghlu: buningdin kéyin konsulxana mulazimitide süniy idraktin paydilinimiz (dédi)» serlewhilik xewiride, dölitimiz (türkiye jumhuriyiti) tashqi ishlar ministiri mewlüt chawushoghluning <konsulxana mulazimetliride süniy idraktin paydilinidighanliqini we aldimizdiki künlerde süniy idraktin paydilinip 7 kün 24 saet boyiche her xil mulazimetler bilen teminleshni bashlaydighanliqlirini éytqanliqini yazdi.

gézitning xewiride körsitilishiche, türkiyening 2019- yili reqemlik diplomatiye teshebbusini yolgha qoyghanliqini tekitligen chawushoghlu: «biz yene tashqi siyasetning tereqqiyatini bayqash, tereqqiy qildurush we tehlil qilishta süniy idraktin paydilinimiz» dégen.

«yéngi shepeq» géziti: « ibrahim qalin baydinning 1915 – yil (toghrisidiki sözlirige) naraziliq bildürüp: zamaniwi wehshiyler özünglargha qaranglar (dédi)» serlewhilik xewiride, (türkiye jumhuriyiti) jumhur reislik mehkimisi bayanatchisi ibrahim qalinning, 1915 – yil weqeliri toghrisidiki bayanatida yene bir qétim «irqiy qirghinchiliq» dégen ibarini ishletken amérika pirézidénti jow baydingha naraziliq bildürüp: «milyonlighan kishini ölüm girdabigha ittirgen, dunya urushlirini qozghighan, keng kölemlik qirghuchi qorallarni yasap chiqqan, atom bombisi tashlighan, qul sodisi qilghan we insanlarni haywanatlar baghchilirida körgezme qilghan zamaniwi wehshiyler... bizning tariximizda irqiy qirghinchiliq, irqiy tazilash yaki chong qirghinchiliq daghliri yoq. eynekning aldigha bérip özünglargha qarap béqinglar» dégenlikini oqurmenliri bilen ortaqlashti.

«xabertürk» géziti: «ministir aqar (türkiyening) térrorluqqa qarshi turush iradisi (ni tekitlidi)» serlewhilik xewiride, (türkiye jumhuriyiti) dölet dölet mudapie ministiri xulusi aqarning, iraq chégrasining nöl nuqtisidiki déngiz yüzidin 2300 égizlikke jaylashqan geyiktepe herbiy rayonigha bérip, eskerler bilen körüshkenlikini hemde u yerde söz qilip, türkiyening nopusi, medeniyiti, tarixi, armiyesi we milliti bilen büyük bir dölet ikenlikini tekitlep, térrorluqqa qarshi turushning iradisining qetiyliki toghrisida signal bergenlikini yazdi.

«sabah» géziti: «p k k ning qachidighan töshüki qalmidi» serlewhilik xewiride, türkiye armiyesining iraqning shimalida «penche - qulup» zerbe bérish herikiti élip bérip, zap we awashin – basyan wadilirida bixeter rayon berpa qilish üchün bölgünchi térrorluq teshkilati p k k unsurlirini tazilawatqanliqini؛  éghir zerbige uchrighan térrorchilarning chékinip, gare we qandil terepke qachqanliqini, süriyening shimalidimu p k k / y p g gha yéqinqi mezgillerning eng éghir zerbisining bérilgenlikini yazdi.

«star» géziti: «türkiye afriqagha yardem bérishte nahayiti séxiyliq (qiliwatidu)» serlewhilik xewiride, londonda chiqidighan «iqtisadshunas» zhurnilining bir analiz xewiride, türkiyening afriqa döletliri bilen bolghan siyasiy, iqtisadiy we medeniyet saheliridiki munasiwetlirining künséri küchiyiwatqanliqi, uning yene insanperwerlik yardem xizmetliri arqiliqmu afriqa bilen bolghan munasiwitini kücheytkenliki otturigha qoyulup: «türkiye bolupmu herbiy we iqtisadiy yardemge mohtaj bolghiningizda, nahayiti séxiy ikenliki bilen nam chiqarmaqta» dégen ibarilerge orun bergenliki toghrisidiki uchurlargha orun ajratti.