15.04.2022

türkiye awazi radiyosi: «hörriyet» géziti: «halqiliq söhbette tinchliq tekitlendi» serlewhilik xewiride, jumhur reis rejep tayyip erdoghanning awstriye bash ministiri karl néxammér bilen téléfonlashqanliqini؛ söhbet jeryanida erdoghanning,  ukraina urushi peyda qilghan tragédiyelerge xatime bérish we urush toxtitishni ishqa ashurush üchün barliq pursetlerdin paydilinish kéreklikini, tinchliq söhbetlirini ilgiri sürüsh üchün istanbul musapisining qollap – quwwetlinishi lazimliqini tilgha élip, türkiyening mesilige tinch hel qilish charisi tépish tirishchanliqini dawamlashturidighanliqini otturigha qoyghanliqini yazdi.

«star» géziti: «slowakiye <bayraqtar t b 2> üchün heriketke ötti» serlewhilik xewiride, yene bir döletning türkiyening dunyada dangq chiqarghan qoralliq uchquchisiz hawa apparati <bayraqtar t b 2>ni sétiwélishni telep qilghanliqini yazdi.

gézitning xewiride körsitilishiche, slowakiye dölet mudapie ministiri, dölitining türkiye bilen <bayraqtar t b 2>ni sétiwélish söhbitini bashlighanliqini jakarlighan.

«yéngi shepeq» géziti: «türkiyening kök (mawi) weten seperwerliki» serlewhilik xewiride, türkiyening, xelqara soda we qatnashni özara maslashturushning muhim nuqtilirining biri bolghan déngiz liniyeliridiki port sanini 2053-yilighiche hazirqi 217 din 255 ke köpeytishni nishan qilghanliqi toghrisidiki uchurlargha orun berdi.

gézitning xewiride körsitilishiche, türkiye  «yéshil port» siyasitini kéngeytip yolgha qoyup, portlarda qayta hasil bolidighan énérgiye bayliqini ishlitishni kapaletke ige qilidiken.

«xabertürk» géziti: «mashina éksportida rékort (yaritildi)» serlewhilik xewiride, türkiyening mashina éksportining (bu yilning) birinchi charikide 6 milyard 100 milyon dollargha yétip rékort yaratqanliqini؛ birinchi charekte, éksport omumiy sommisining %5 tin köprekining urushqa qarimay rusiye bilen ukrainagha qilinghanliqini, amérika bilen gérmaniyege 1 milyard dollarliqtin artuq mehsulat ewetilgenlikini yazdi.

«weten» géziti: «istanbul dunyadiki eng jelpkar sheherlerning biri» serlewhilik xewiride, 2021 - yilidiki eng jelpkar sheherler tizimlikining élan qilinghanliqini؛ engliyediki tetqiqat shirkiti Euromonitor teripidin «yuqumgha qarshi kürishi, ul esliheliri, imkaniyetlik sijilliqi, iqtisadi, ahalisining turmush süpitini saqlap qélishi, hemde sayahetchilerni jelp qilip sahibxanliq qilish jeryanidiki xirislarni yéngishi qatarliqlar közde tutulup teyyarlanghan tizimlikke istanbulningmu kirgüzülgenlikini yazdi.