08.04.2022

türkiye awazi radiyosi: «yéngi shepeq» géziti: «chawushoghlu: buchagha alaqidar körünüshler söhbetlerge kölengge chüshürdi (dédi)» serlewhilik xewiride, dölitimiz (türkiye jumhuriyiti) tashqi ishlar ministiri mewlüt chawushoghluning shimaliy atlantik ehdi teshkilati – natogha eza döletler tashqi ishlar ministirliri yighinidin kéyin bayanat bérip, gerche rusiye-ukraina urushigha munasiwetlik söhbetler ijabiy dawamlishiwatqan bolsimu, emma buchadin kelgen puqralar qetliamini qobul qilghili bolmaydighanliqini otturigha qoyup: «bu körünüshler söhbetlerge we ijabiy atmosfiragha kölengge chürüdi, shundaqtimu bu qiyin sharait astida söhbetler dawamlishishi kérek» dégenlikini oqurmenlirining diqqitige sundi.

«xabertürk» géziti : «amérika türkiyege sétip bérilgüsi F-16 tipliq urush ayropilanlirining amérika we natoning menpeeti üchün xizmet qilidighanliqini éytti» serlewhilik xewiride, amérika tashqi ishlar ministirliqining dölet mejlisige mektup yollap, baydin hökümitining türkiyege sétip bergüsi F-16 küreshchi ayropilanlirining amérikaning dölet bixeterlik menpeetige,  mas kélidighanliqigha, shundaqla shimaliy atlantik ehdi teshkilati – natoning uzun muddetlik ittipaqliqigha xizmet qilidighanliqigha ishinidighanliqini bildürgenlikini yazdi.

«star» géziti: «türk salmon béliqi ispaniyede tonushturulidu» serlewhilik xewiride, bu yilning birinchi peslide 20 döletke sétilghan türkiyening salmon béliqining 4- ayning 26- künidin 28- künigiche ispaniyede ötküzülidighan yermenkide tonushturulidighanliqini we bu arqiliq éksport bazirini kéngeytishning közliniwatqanliqini yazdi.

«hörriyet» géziti: «sayahetchiler marmarisqa kélishke bashlidi» serlewhilik xewiride, türkiye we dunyaning eng yaqturulidighan sayahet sheherlirining biri bolghan mughlaning marmaris nahiyesidiki méhmanxanilarning yéngi pesilge teyyarliq qilish xizmitini tamamlap, méhmanlirini kütüwélishqa bashlighanliqini, köpinchisi engliye, israiliye, bélgiye we irandin kelgen sayahetchilerning déngiz sahilida quyashqa qaqlinishni bashliwetkenlikini yazdi.

«sabah» géziti: «dunyagha dangliq naxshichi hembehirlidi! türkiyelik egeshküchiliri inkas yaghdurdi» serlewhilik xewiride, dunyagha dangliq naxshichi xalséyning özining ijtimaiy alaqe supisidiki adrésida türkche uchur hembehrilep kishilerning diqqitini tartqanliqini yazdi.

gézitning xewiride körsitilishiche, amérikaliq naxshichi oghli ender we uning söygini alew aydin bilen birlikte chüshken foto – süriti we uning bilen qoshup hembehriligen «söygü ortaqlashqanséri küchiyidu» dégen sözi nurghun kishining yaqturushigha érishken, nechche ming türk inkas yazghan.