28.03.2022
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹xewer türk› géziti», «rusiye –ukraina muzakiriliri istanbulda emelge ashurulidu» serlewhilik xewiride, töwendiki melumatlarni oqurmenlirining diqqitige sundi:
jumhur reis rejep tayyip erdoghan rusiye pirézidénti wladimir putin bilen téléfonda körüshti. téléfon söhbitide, jumhur reis erdoghan, rusiye – ukraina otturisida urush toxtitilishi we derhal tinchliq kélishimi hasil qilinishi, hemde rayondiki insaniy ehwalning yaxshilinishining zörürlükini tekitlesh bilen bir waqitta, türkiyening bu basquchta her jehettin hesse qoshushni üzlüksiz dawamlashturidighanliqini qeyt qildi.
téléfon söhbitide, rusiye – ukraina muzakirilirining istanbulda emelge ashurulushi toghruluq birdeklik hasil qilindi.
«‹sabah› géziti», «türkiyening tinchliq ornitish diplomatiyesi jumhur reis erdoghanning diplomatik uchrishishliri mezmun qilinghan kitabche arqiliq pütkül dunyagha tonushturulidu» serlewhilik xewiride, munu uchurlargha orun ajratti:
jumhur reis rejep tayyip erdoghanning, rusiye – ukraina kirizisige xatime bérilishi yolida élip bériwatqan qoyuq diplomatik uchrishishliri – paaliyetliri kitablashturuldi. «türkiyening muqimliqqa qoshuwatqan töhpisi: tinchliq nishan qilinghan köp yönülishlik diplomatiye» témiliq kitabchening kirish söz qimisida, jumhur reis erdoghanning, «sel qarilidighan eng kichik bir mesiliningmu nahayiti chong apetlerni keltürüp chiqiridighanliqi bu basquchta yene bir qétim ispatlandi. shundaqla, rusiye – ukraina otturisidiki bu urush, bixeterlik we muqimliqni qoghdash üchün qurulghan xelqaraliq tertiplerning téximu küchlük bolushi we hel qilghuch tedbirlerni qollinishi kéreklikini körsitip berdi» teriqisidiki sözlirige orun bérildi.
«‹star› géziti», «türkiyedin ittipaqdashlirigha ochuq – ashkara signal» serlewhilik xewiride, töwendiki melumatlarni oqurmenlirining diqqitige sundi:
dölet mudapie ministiri hulusi aqar, tarixtiki eng muhim we muweppeqiyetlik ittipaqdashliq teshkilatining shimaliy atlantik ehdi teshkilati ikenlikini hemme bilidighanliqi, bu teshkilatni téximu qudret tapquzush üchün téximu küchlük eza döletlerge éhtiyaj tughuluwatqanliqini tekitlep mundaq dédi: «biraq, bügünki künde ittipaqdashlirimizning dölitimizge qarita naheq éksport cheklimiliri peqet türkiyegila emes, shimaliy atlantik ehdi teshkilatighimu selbiy tesir körsetmekte.»
«‹höriyet› géziti», «kishini cheksiz hayajangha salidighan uchur: qizil alma qanatlandi» serlewhilik xewiride, munu uchurlargha orun ajratti:
türkiyening uchquchisiz hawa apparatliri ishlepchiqarghuchisi bayqar téxnologiye guruhining diréktori selchuq bayraqtar, ammiwi ortaqlishish tor béti Twitter sehipiside, uchquchisiz hawa apparatlirini ishlepchiqirish merkizi heqqide uchur élan qildi. u qizil alma küreshchi uchquchisiz ayropilan sistémisigha ait körünüshlük uchurida, qizil alma modéligha qanat ornitilghanliqini, qizil almaning 2023-yili tunji qétim sinaq qilinishining pilanliniwatqanliqini eskertti.
«‹yéngi shepeq› géziti», «anadoluning türlük uruq, ösümlük we haywanatliri qoghdalmaqta» serlewhilik xewiride, munu uchurlargha orun ajratti:
yéza igilik we ormanchiliq ministirliqi, türkiyening biyologiyelik köp xilliqini qoghdash üchün nahayiti zor tirishchanliq körsetmekte. ministirliq, biyologiyelik köp xilliqni qoghdash dairiside anadoluning türlük uruq, ösümlük we haywanatlirini qoghdimaqta. bu dairide, gén bankasida anadoluning türlük uruq, ösümlük we haywanat türliri qoghdalmaqta. gén bankalirida 318 ming matériyal saqlanmaqta.
