25.03.2022

türkiye awazi radiyosi: «xabertürk» géziti: «erdoghan: shimaliy atlantik ehdi teshkilati réalist we istratégiyelik bolushi kérek (dédi)» serlewhilik xewiride, jumhur reis rejep tayyip erdoghanning shimaliy atlantik ehdi teshkilati — nato bashliqlar yighinidin kéyin bayanat bérip: « bizge qoyulghan émbargolar ittipaqdashlirimizning küntertipigimu kirmesliki kérek... türkiye mudapie sanaiti mehsulatlirining muweppeqiyetliri éniq otturida turuwatqan ehwalda, biz duch kelgen tosalghularni aqlighili bolmaydu. bir qisim ittipaqdashlirimizning mudapie sanaitimizning aldigha qoyghan tosalghulirini élip tashlash hemmimizning ortaq menpeetimizdur» dégenlikini oqurmenliri bilen ortaqlashti.

«hörriyet» géziti: «türkiye muressechilik rolini oynashqa teyyar» serlewhilik xewiride, jumhur reis erdoghanning, türkiyening rusiye bilen ukraina otturisidiki urushni axirlashturush üchün muressechilik qilish rolini oynashqa teyyar ikenlikini otturigha qoyup: «biz rusiye pqrézidénti wiladimir putin we ukraina pirézidénti wiladimir zélénski bilen bolghan söhbetlirimizni buningdin kéyinmu dawamlashturimiz. bizning barliq tirishchanliqimiz bu ikki rehberni bir yerge jem qilip, tinchliq keypiyati yaritishtin ibaret» dégen sözlirige orun berdi.

«sabah» gézitining «türkiyening natodiki ehmiyiti yene bir qétim tonup yétildi» serlewhilik <hem shimaliy atlantik ehdi teshkilati – nato hemde yawropa ittipaqigha eza döletlerning rehberlirining, nato bashliqlar yighinidin ilgiri türkiyede ziyarette bolghanliqi>gha isharet qilip ötülgen xewiride, nato bashliqlar yighini jeryanida jumhur reis erdoghanning köp qétim ayrim uchrishishlarni ötküzgenliki, türkiyening ittipaqtiki ehmiyitining yene bir qétim tonup yétilgenliki otturigha qoyuldi.

gézitning xewiride körsitilishiche, bundaq bolushida, rusiye ukrainagha tajawuz qilghandin kéyin, türkiyening mezkur ikki dölet bilen sözlisheleydighan bolushi, mudapie sanaiti sahesidiki üstünlüki, shundaqla énérgiye we soda yolliri üchün kem bolsa bolmaydighan orni muhim rol oynighan.

«star» géziti: «italiye bash elchisi: türkiye yawropa üchün muhim (dédi)» serlewhilik xewiride, italiyening enqerede turushluq bash elchisi giorgiyo marrapodining, italiye bilen türkiyening qoyuq munasiwetlirining osmanli impériyesigiche tutishidighanliqini we bu munasiwetlerning yéqinqi esirlerdimu barghanséri kücheygenlikini tilgha élip: «men türkiyening istratégiyelik küchi, yoshurun küchi, yawropa üchün muhimliqi we italiye bilen bolghan qoyuq munasiwitining kelgüsige ishinimen. türkiyening orni we ehmiyiti uning dunya bilen bolghan iqtisadiy we siyasiy alaqisining menggü küchlük bolidighanliqini körsitip béridu» dégenlikini oqurmenliri bilen ortaqlashti.

«yéngi shepeq» géziti: «türkiyening xam eshya kirizisigha tapqan charisi» serlewhilik xewiride, türkiye bilen yawropa ittipaqigha eza 6 dölettiki éléktironluq mashina we éléktironluq üskünilerde ishlitilip konirap ketken litiy iyonluq bataréyelerdin élinidighan xam maddilarning, sakariya uniwérsitétida ela süpetlik bataréyelerge aylandurulup qaytidin bazargha sélinidighanliqini, sakariya uniwérsitéti tetqiqatchiliri qurup chiqqan «sakariya téknopolis» da meshghulat élip bériwatqan shirketning mezkur türining yawropa ittipaqining qollishigha érishkenlikini yazdi.