14.03.2022

türkiye awazi radiyosi: «‹höriyet› géziti», «jumhur reis erdoghan girétsiye bash ministiri kiryakos michotakis bilen körüshti» serlewhilik xewiride, töwendiki melumatlarni oqurmenlirining diqqitige sundi:
jumhur reis rejep tayyip erdoghan, tünügün girétsiye bash ministiri kiryakos michotakis bilen bir yerge jem boldi. uchrishishta, türkiye – girétsiye munasiwetlirige dair mesililerdin sirt yene, kündilik géopolitikiliq özgirishler toghriliqmu muzakire élip bérildi.
«‹xewer türk› géziti», «birleshken döletler teshkilati jumhur reis rejep tayyip erdoghangha minnetdarliq bildürdi» serlewhilik xewiride, munu uchurlargha orun ajratti:
jumhur reis rejep tayyip erdoghan tünügün birleshken döletler teshkilati bash katipi antonyo gutérésh bilen téléfonda körüshti. jumhur reislik mehkimisi uchur – alaqe ishliri idarisining bildürüshiche, ikki rehberning téléfon söhbitide, birleshken döletler teshkilati bash katipi antonyo gutérésh, rusiye – ukraina otturisidiki muressechilik teshebbusliri, tinchliqning ishqa ashurulushigha qarita qoshuwatqan töhpliri we diplomatik tirishchanliqliri tüpeyli jumhur reis rejep tayyip erdoghangha minnetdarliq bildürgen.
«‹sabah› géziti», «chawushoghlu <xelqara jemiyetning dölitimizge  ishinidighanliqi hemige ayan> dédi» serlewhilik xewiride, töwendiki melumatlarni oqurmenlirining diqqitige sundi:
tashqi ishlar ministiri mewlüt chawushoghlu, tünügün «antalya diplomatiye munbiri» yighinidin kéyin élan qilghan bayanatida, rusiye – ukraina urushi heqqide toxtilip mundaq dédi: «her ikki terepningmu bu yighingha biz bilen birlikte qatnishishni xalishi,  xelqara jemiyetning dölitimizge  ishinidighanliqining eng roshen namayendisidur.»
«‹yéngi shepeq› géziti», «altun <dölitimiz dunyaning merkizige aylinidu> dédi» serlewhilik xewiride, munu uchurlarni  oqurmenlirining diqqitige sundi:
jumhur reislik mehkimisi uchur - alaqe ishliri idarisining bashliqi fahrettin altun, tünügün ammiwi ortaqlishish tor bétidiki sehipiside élan qilghan bayanatida, türkiyening buningdin kéyinki basquchtimu diplomatik we istiratégiyelik jehettin dunyaning merkizi bolidighanliqini, derweqe, türkiyening istiratégiyelik jehettiki ewzellikliri, géopolitikiliq we géoiqtisaiy jehettin dunyadiki ehmiyitini yéqinqi bir hepte ichidiki qoyuq diplomatik paaliyetliri arqiliq pütkül jahangha namayen qilghanliqini tekitlidi.
«‹star› géziti»,« sérraléon tashqi ishlar ministiri frensis, «türkiyedin öginishni xalaymiz> dédi» serlewhilik xewiride,  töwendiki uchurlarni oqurmenlirining diqqitige sundi:
sérraléon tashqi ishlar ministiri dawid frensis, tünügün «antalya diplomatiye munbiri» yighinida qilghan sözide, türkiyediki téxnologiye we ul eslihelerge munasiwetlik tereqqiyatlardin intayin tesirlengenlikini tekitlep mundaq dédi: «biz türkiyedin öginishni xalaymiz. derweqe siz türkiyege kelginingizde we türkiyening bir chétidin yene bir chétige sayahetke barghinginizda, téxnologiye we ul eslihelerge munasiwetlik tereqqiyatlarni köreleysiz.»