11.03.2022
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi xewiri: «star» géziti: «erdoghan baydin bilen körüshti» serlewhilik xewiride, jumhur reis rejep tayyip erdoghanning tünügün amérika pirézidénti jo baydin bilen téléfonliship, rusiyening ukrainagha qilghan hujumi qatarliq rayongha alaqidar mesililer we türkiye - amérika munasiwetliri toghrisida sözleshkenlikini yazdi.
«hörriyet» géziti: «jumhur reis erdoghan bilen eliyéw «ukraina» uchrishishi (ötküzdi)» serlewhilik xewiride, jumhur reis rejep tayyip erdoghanning tünügün paytext enqerediki chanqaya sariyida ezerbeyjan pirézidénti ilham eliyéw bilen körüshkenlikige, ikki rehberning rusiye - ukraina urushigha munasiwetlik eng yéngi ehwallar we türkiye - ezerbeyjan munasiwiti qatarliq rayonluq mesililer toghrisida sözleshkenlikige dair uchurlarni oqurmenliri bilen ortaqlashti.
«weten» géziti: «tashqi ishlar ministiri chawushoghlu: üstel üstide etrapliq tinchliq kélishimi (tüzüsh pilani bar dédi)» serlewhilik xewiride, tünügün türkiyening muresse qilishi bilen antalyada ötküzülgen rusiye - ukraina tinchliq söhbitidin kéyin bayanat bergen (türkiye) tashqi ishlar ministiri mewlut chawushoghluning: «küntertipte etrapliq bir tinchliq kélishimining imzalinishimu bar. bundaq ehwalda, ukrainaning bezi döletlerning bu yerde képil bolushini ümid qilidighanliqini bilimiz. ularning biri türkiyedur» dégen sözlirige orun ajratti.
«sabah» géziti: «türkiyening alem qatnishi sahesige salghan meblighi mudapie sanaitinimu tézlitidu» serlewhilik xewiride, türkiye alem qatnishi idarisi bashliqi serdar hüseyin yildirimning, alem qatnishigha sélinghan mebleghning mudapie sanaitinimu tézlitidighanliqini bayan qilip: «aygha baralaydighan bolushning bizge élip kélidighan téxnikiliq paydisi intayin muhim, bu türkiyeni (yükseklerge) sekritidighan bir ish» dégen sözlirige orun berdi.
«xabertürk» géziti: «ishsizliq nisbiti élan qilindi» serlewhilik xewiride, türkiye istatistika idarisining yanwar éyi emgek küchi sanliq melumatlirini élan qilip, ishsizliq nisbitining yanwar éyida %11.4 bolghanliqini bildürgenlikini yazdi.
