14.08.2018

sitar géziti «erdoghan: türkiye iqtisadiy jehettin qorshaw astida qaldi, dédi»serlewhilik xewiride munu uchurlarni oqurmenlirining diqqitige sundi: «jumhur reis rejep tayyip erdoghan tünügün jumhur reislik sariyida 10-nöwetlik elchilar yighinigha qatnashqanlarning sheripige bérilgen ziyapette söz qilip, amérika pirézidénti donald trampning türkiyege émbargo qoyushni qarar qilishining perwasizlache qilmish ikenlikini alahide eskertip ötti. erdoghan yéqinqi mezgillerde türkiyening xelqara sehnide qolgha keltürgen zor utuqliri seweblik hujum nishanigha aylanghanliqini tekitlep, türkiyening bashqa sahelerge oxshash iqtisadiy sahedimu qorshawgha élinghanliqini éytti.»

haber türk géziti «kalin: türkiye iqtisadining immunit küchi mustehkemdur,dédi»serlewhilik xewiride munu uchurlarni oqurmenliri bilen ortaqlashti: «jumhur reislik sariyi bayanatchisi ibrahim kalin ijtimaiy taratqudiki adérisida türkiyening nöwettiki iqtisadiy ehwali üstide toxtaldi. kalin uchurida mundaq dédi: xezine we maliye ishliri minsitirliqi, merkez bankisi, banka ishlirini tertipke sélish we nazaret qilish idarisi qatarliq alaqidar organlirimiz dölitimizning pul-muamile sistémisining muqimliqi üchün tégishlik tedbirlerni éliwatidu, türkiye iqtisadining immunit küchi mustehkemdur, yalghan xewerlerge qulaq salmasliqimiz kérek, türkiye bu qiyin ötkeldin saq-salamet ötüp kétidu.»

sabah géziti «tashqi ishlar ministiri mewlüt chawushoghlu xelqarani türkiyege meblegh sélishqa chaqirdi»serlewhilik xewiride munu uchurlargha orun ajratti: «tashqi ishlar ministiri mewlüt chawushoghlu 10-nöwetlik elchilar yighinining échilish murasimida munularni bayan qildi: nöwette yérimi dégüdek yawropa qitesi bolup oxshimighan qitelerdin jemiy 74 döletning türkiyede meblighi bar.  téximu köp shirket we shexsni dölitimizge meblegh sélishqa qiziqturush üchün hemkarliship xizmet qilimiz. pütkül dunyani dölitimizge meblegh sélishqa chaqirimen. tetür teshwiqatlar we dunyaning nöwette qiyin sinaqlarni bashtin kechürüwatqan bolushining eksiche türkiye meblegh sélishqa eng muwapiq adréslardin biridur.»

yéngi shepeq géziti «albayrak: gérmaniyening bayanatidin söyünduq, dédi»serlewhilik xewiride munu uchurlargha orun ajratti: «xezine we maliye ishliri ministiri berat albayrak : amérika türkiyege émbargo qoyushni qarar qildi, buninggha qarshi gérmaniye hökümitining élan qilghan bayanatidin xursen bolduq, yaxshiliq we diplomatiyeni yaqlaydighan siyasetchiler, gérmaniye we yawropa ittipaqi bilen bolghan munasiwetlirimiz türk xelqining ishenchisini kücheytidu, dédi. gérmaniye hökümiti<türkiye iqtisadining muqim bolushi bizgimu paydiliq, biz weziyetni yéqindin közitiwatimiz> dégen mezmunda bayanat bergenidi.»

hürriyet géziti «iraqliq sayahetchiler türkiyede sayahet qilishni yaxshi köridu»serlewhilik xewiride munu uchurlarni oqurmenliri bilen ortaqlashti: «türkiye tarixiy we tebiiy güzellikliri bilen iraqliq sayahetchilerning diqqitini jelp qilmaqta. iraqning bolupmu jenubiy wilayetliridin kerkük we erbilge kélip sayahet shirketliri teshkilligen sayahet seperlirige qatnishidighanlarning sanida körinerlik éshish körülmekte. kerküktiki bir sayahet shirkitining bashliqi hidayet mehdi, bu yil iyundin hazirghiche kerküktin künde eng az 500 sayahetchining türkiyege mangidighanliqini éytti.»