30.05.2018

türkiye awazi radiyosi: "yéngi shepeq géziti", dölitimiz jumhur reisi rejep tayyip erdoghan bilen rusiye pirézidénti wladimir putinning téléfonda körüshkenlikini xewer qildi.

gézitning xewiride, ikki rehberning téléfon söhbitide, süriyening nöwettiki weziyiti, akkuyu yadro éléktir istansisi layihesi we türk éqimi tebiiy gaz turuba yoli layiheside qolgha keltürülgen ilgirileshlerning kishini xushal qilidighanliqini bildürgenliki qeyt qilindi.

xewerde, téléfon söhbitide yene, süriye kirizisini siyasiy diyalog bilen hel qilish yolining échilishi üchün, astana méxanizmi bilen qolgha keltürülgen netijilerning ehmiyitining tekitlengenliki bildürüldi.

"xeber türk géziti", bundin 25 yil burun gérmaniyening solingén shehiride öyige ot qoyup bérilishi seweblik jénidin ayrilghan gench ailisining besh ezasi üchün düsséldorftiki shimaliy rén wéstfaya ishtatining binasida xatirilesh murasimi ötküzülgenlikini xewer qildi.

xewerde, murasimgha, gérmaniye bash ministiri angéla mérkél, türkiye tashqi ishlar ministiri mewlüt chawushoghlu, ishtat bashliqi armin laschét we bashqa nurghun méhmanlarning qatnashqanliqi bildürüldi.

xewerde, türkiye tashqi ishlar ministiri mewlüt chawushoghluning gench ailisining béshigha kelgen tiragédiye we gérmaniyede irqiy ayrimichiliq hujumlirigha duchar bolghan bashqa türkiye puqralirining mesililirini alahide tilgha élip: "gérmaniyeni özige ikkinchi weten qilghan bu kishilerning birdinbir arzusi, yashawatqan jemiyitining barawer ezasi, barawer birer parchisi bolushtur" dégenliki qeyt qilindi.

"sabah géziti", 2018-yili sayahetchilikte 14 milyon sayahetchini nishan qilghan antalyagha, 28-may künigiche peqet ayrodurumdin kelgen sayahetchi sanining 3 milyongha yéqinlashqanliqini xewer qildi.

xewerde, bu reqemning 2015, 2016 we 2017-yildiki reqemlerni arqida qaldurghanliqi we sayahetchilikte eng yaxshi yil dep qaralghan 2014-yiligha yétishkenliki eskertildi.

"weten géziti", istanbul zeyrektiki tarixiy sheyx sulayman mesjidini rémont qilish jeryanida, yer asti qewette tarixining 1700 yilliq ikenliki texmin qilinghan "pagan maziri" ning bayqalghanliqini xewer qildi.