06.06.2017
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi xewiri: «‹sabah› géziti», «paris qoltuqi kirizisi yüz bergendin kéyin enqere heriketke ötti» serlewhilik xewiride, töwendiki melumatlargha orun ajratti:
7 döletning qatar bilen diplomatik munasiwetni üzüsh toghruluq qarar chiqirishidin kéyin, paris qoltuqining weziyiti keskinliship ketti. seudi erebistan, behreyn, misir, ereb birleshme xelipiliki, yemen, liwiye we maldiwi qatarliq döletler qatar bilen diplomatik munasiwetni üzgendin kéyin, jumhur reis rejep tayyip erdoghan kirizisni hel qilish heriketke ötüp, nahayti zor tirishchanliq körsetti.
erdoghan qatargha yürgüzülgen émbargolarning bikar qilinishi üchün rusiye pirézidénti wiladimir putin, kuweyt emiri sheyx sabah elehmed essabah we seudi erebistan padishahi selman bin abduleziz essuud bilen téléfonda körüshti.
«‹höriyet› géziti», «türkiye ruxset bermigenliki üchün, gérmaniye injirlik herbiy bazisidiki eskerlirini chékindüridu» serlewhilik xewiride, töwendiki uchurlarni oqurmenliri bilen ortaqlashti:
gérmaniye tashqi ishlar ministiri sigmar gabriélning enqere ziyaritimu injirlik mesilisini hel qilalmidi. tashqi ishlar ministiri mewlüt chawushoghlu gérmaniye tashqi ishlar ministiri gabriél bilen ötküzgen qoshma axbarat élan qilish yighinida, gérmaniye heyitining injirlik herbiy bazisini ziyaret qilishigha ruxset qilinmaydighanliqini tekitlep mundaq dédi: «gérmaniye heyiti hazirqi ehwal astida peqet konyadiki nato herbiy bazisinila ziyaret qilalishi mumkin.»
türkiyening pozitsiyesidin tolimu epsuslinidighanliqlirini eskertken gabriél bolsa, gérmaniyening injirlik herbiy bazisidiki eskerliri we ayropilanlirini chékindürüp chiqip kétishtin bashqa charilirining yoqluqini tekitlep mundaq dédi: «chékinish bu hepte yaki kéler hepte ishqa ashurulidu.»
«‹yéngi shepeq› géziti», «eng alahide manéwir» serlewhilik xewiride, töwendiki bayanlargha orun ajratti:
giruziyede kawkaz bürküti alahide qisimlar manéwiri türkiye, ezerbeyjan we giruziyening ishtirak qilishida tiflistiki waziani herbiy bazisida bashlandi. türkiye 14 – iyunghiche dawamlishidighan manéwirgha bir alahide qisim, bir mutexessis mergen, ikki tik uchar ayropilan we bir tiransport ayropilani arqiliq qatnashmaqta.
«‹xewer türk› géziti», «türkiye iqtisadiy tereqqiyatta 7 küchlük dölettin birige aylinidu» serlewhilik xewiride, töwendiki mezmunlargha orun ajratti:
dunya bankisi türkiyening bu yilliq iqtisadiy tereqqiyat mölchirini 0.5 ashurup, % 3.5 ke chiqardi. fethullahchi térrorluq teshkilati unsurlirining muweppeqiyetsiz 15 – iyul herbiy isyan urunushidin kéyin, türkiyening iqtisadiy tereqqiyatining téz boluwatqanliqini eskertken banka, türkiye, xitay, biraziliye, méksika, hindistan, hindonéziye we rusiyedin teshkil tapqan tereqqiy qiliwatqan eng küchlük döletlerning dunya iqtisadining tereqqiy qilishida bashlamchiliq roli onaydighanliqini mölcherlidi.
«‹star› géziti», «dala filim féstiwali <la la land> bilen bashlandi» serlewhilik xewiride, töwendiki uchurlarni oqurmenliri bilen ortaqlashti: «istanbulda ötküzülgen UNIQ dala filim féstiwali tünügün «la la land» filimining qoyulushi bilen bashlandi.
16 – séntebirgiche dawamlishidighan féstiwal, yaz boyiche heptining üch küni kino mestanilirini tallanghan filimler bilen uchrashturidu. féstiwal dairiside tamashibinlar bilen yüz körüshidighan filimler, qisqa filimler, heriketlik teswirler, qiziqarliq filimler, qorqunuchluq filimler, höjjetlik filimler, ajayip we özgirishchan filimler qatarliqlardin teshkil tapidu.
