23.08.2014

türkiye awazi radiyosi xewiri: «‹sabah› géziti», «gérmaniyening türkiyeni oghriliqche tingshishi sihödér dewride bashlandi» serlewhilik xewiride, türkiyening, gérmaniye fédéral jasusluq teshkilatigha 1998 - 2005 - yilliri yésheller partiyesi bilen sotsiyal démokratlar partiyesi teripidin qurulghan birleshme hökümetning buyruqigha asasen jasusluq paaliyetliri bilen shughullinilidighan döletler tizimlikige kirgüzülgenlikini ilgiri sürdi. buninggha asaslanghanda, jasusluq paaliyetliri élip bérilidighan döletler 3 türge ayrilghan؛ türkiye, birinchi derijilik jasusluq paaliyetliri élip bérilidighan döletler tizimlikige kirgüzülgen. sotsiyal démokratlar partiyesi ezasi sabiq bash ministir gérhard sihödér, yésheller partiyesi bilen 1998 - yili birleshme hökümet qurghan, 7 yil bash ministir bolghanidi. gérmaniye diplomatiye ministiri sitéynméyér bolsa shu chaghdiki jasusluq teshkilatlirigha mesul ministir idi.
«‹milliyet› géziti», «istanbulda ishxana ijarisi nahayiti yüksek sewiyede» serlewhilik xewiride, istanbulning herqaysi jayliridiki a derijilik ishxana ijarisining % 1.40, b derijilik ishxana ijarisining bolsa % 3.76 ösüp ketkenlikini yazdi. gézit, esentepe, a derijilik ishxanilarning bir kwadrat métirliq ijrasining 43.46 dollar bilen eng yüksek ijare qimmitige ige rayon ikenlikini oqurmenliri bilen ortaqlashti.
«‹weten› géziti», «6 ming kishi bilen atatürk portréti» serlewhilik xewiride, bash qomandanliq ishtabi urush opératsiyesining 92 - yilliqini xatirilesh paaliyetlirining bu yil daghdughiliq ötküzülidighanliqini yazdi. gézit, atatürk xatire sariyi qorusida 6 ming kishi bilen mislisiz hujumning bash qomandani mustapa kamal atatürkning janliq portréti shekillendürilidighanliqini eskertti. gézitning xewirige qarighanda, «dunyaning eng chong atatürk portréti» ning «ginis tarixiy xatiriler mejmuesi» ge kirgüzülüshi nishan qiliniwatqan paaliyetlerning deslepkisi, 2012 - izmirde 2 ming 400 kishi bilen, ikkinchisi bolsa 2013 - yili bursada 5 ming 990 kishi bilen ishqa ashurulghan.
«‹yéngi shepeq› géziti», «intérnétning istémal qilinish nisbiti % 50 ke yetti» serlewhilik xewiride, dunya boyiche süriti eng téz intérnét mulazimitidin paydiliniwatqan döletlerning béshida türkiye kélidighanliqini, intérnétning istémal qilinish nisbitining % 50 ke yetkenlikini yazdi. gézitning xewirige köre, türkiye istatistika orginining doklatigha asaslanghanda, 16 yashtin 74 yashqiche kompyutér ishlitidighanlarning nisbiti % 53.5 ke, intérnét ishlitidighanlarning nisbiti % 53.8 ke, sistémiliq halda intérnét ishlitidighanlarning nisbiti bolsa % 38.7 ke yetken. intérnét eng köp öylerde ishlitilidighan bolup, ish orunlirida intérnét ishlitidighanlarning nisbiti % 38.7 bilen ikkinchi orunda turidiken. buning sirtida, intérnét üchün élip yürüshke eplik üskünilerning istémal nisbitimu zor derijide ashqan.