xitay qazaqistanni «bir belwagh bir yol» ning yéngi karidorini birlikte qurushqa chaqiriq qildi
xitay tashqi ishlar ministirliqining bayanatigha asaslanghanda, xitay-qazaqistan tashqi ishlar ministirliri istratégiyelik söhbetning tunji yighinini paytext béyjingda ötküzgen.
türkiye awazi radiyosi xewiri: xitay tashqi ishlar ministiri wang yi yighinda söz qilip, ikki döletning tarixiy yipek yoli liniyesidiki sherq-gherb sodisini janlandurushni meqset qilghan bir belwagh bir yol teshebbusi hemkarliqning muhimliqini tekitlep: «yuqiri süpetlik, sijil we chidamchan yéngi ulinish karidorini birlikte qurayli!» dédi.
wang yi ikki dölet munasiwetlirining yéqinqi ikki yildin buyan küchlük tereqqiyat sharitigha érishkenlikini, qoshna döletler otturisidiki öz-ara ishench, qollash we hemkarliqning yaxshi ülgisige aylanghanliqini tekitlidi.
qazaqistan muawin bash ministiri we tashqi ishlar ministiri murat nurtléu qazaqistanning tashqi siyasitide xitay bilen bolghan munasiwetlerning muhim orunda turidighanliqini, xitay bilen siyasiy ishenchni, xelqler arisidiki tesir we öz-ara menpeet yetküzidighan hemkarliqlarni tereqqiy qildurushni hemde xelqaraliq we rayon xaraktérliq mesililerni maslashturushni xalaydighanliqini bildürdi.
yighinda, terepler bir belwagh bir yol hemkarliqi, yerlik organlar bilen xelqler otturisidiki özara tesir körsitishni kücheytish, tashqi arilishish we singip kirish urunushlirigha qarshi ortaq küresh qilish, jamaet xewpsizliki we bixeterlik saheside hemkarliqni yaxshilash, xitay-ottura asiya dialogi, shangxey hemkarliq teshkilati, asiyada ishench turghuzush tedbirliri konfirasi we birleshken döletler teshkilati qatarliq köp tereplik ramkilar dairisidiki hemkarliqni kücheytish qatarliq témilarda pikir birliki hasil qilindi.
xitayning yawro-asiya bilen bolghan sodisigha nisbeten halqiliq karidor hésablinidighan ottura asiya döletliri ichide qazaqistan tolimu muhim orunda turidu.
xitay reisi shi jinping 2013-yili qazaqistan ziyariti jeryanida tunji qétim bir belwagh bir yol teshebbusini élan qilghan idi.
