bakuda «qanliq yanwar» qirghinchiliqi xatirilendi

türkiye awazi radiyosi xewiri: ezerbeyjan xelqi 1990-yili yüz bergen qetliamda jénidin ayrilghanlarni xatirilesh üchün bakudiki shéhitler qebristanliqi (shéhitler xiyabani)gha qarap sel bolup aqti. baku we bashqa sheherlerdin kelgenler shéhitzarliq aldida uzun öchretlerni hasil qildi. ishtirakchi amma qebrilerge güllerni qoyup, dualarni qildi.

pirézidént ilham eliyéw bilen repiqisi méhriban aliyéwamu shéhitler qebristanliqini ziyaret qilip, ebediy atesh xatire munarigha gülchembirek qoydi. ezerbeyjan xelqi shu yer waqti saet 12:00 de barliq shéhitler üchün bir minut sükütte turup hörmitini ipadilidi. bu jeryanda, hazar déngizi sahilidiki paraxotlar, métro-poyizlar we aptobuslar düdük chaldi.

türkiyening bakuda turushluq bash elchisi jahit baghjimu shéhitler qebristanliqini ziyaret qilip, shéhit qebrilirige gülchembire qoyup, dua qildi. qanliq yanwar munasiwiti bilen türkiyening bakudiki elchixanisidiki türkiye bayriqi yérim chüshürüldi.

1990-yilining bashlirida, ermenlerning éship barghan zémin teleplirige we sabiq sowétler ittipaqigha naraziliq bildürgen ezerbeyjan xelqi, bakuning azadliq meydanida toplinip, uzunghiche yighilish ötküzdi. 20-yanwar yighilishni tarqitiwétish üchün bakuning oxshimighan jaylirigha kirgen sowét qizil armiyesi, ayallar we kichik balilarni öz ichige alghan 150 ke yéqin puqrani qirghin qildi, yüzlerche kishini yaridar qildi.

shéhitler yüz minglarche kishining qatnishishi astida, köz-yashlar ichide gül-chéchekler bilen bügünki künde «shéhitler hiyabani» dep atilidighan qebristanliqqa yerlikke qoyuldi.

ezerbeyjan xelqi 34 yildin buyan her yili 20-yanwarda, qollirida 20-yanwar qurbanlirining simwoligha aylanghan qizil güllerni kötürginiche shéhitzarliqqa kélip, murasim ötküzüp kelmekte.