ezerbeyjan jumhuriyitining 100-yilliqi tebriklendi

türkiye awazi radiyosi xewiri: ezerbeyjan paytexti bakudiki jumhuriyet xatire sariyi aldida 1918-yili 28-may qurulghan jumhuriyetning 100-yilliqi tebriklendi. pirézidént ilham eliyéw tebriklesh murasimigha qatnashti. u ezerbeyjan milliy marshining oqulushi bilen bashlanghan murasimda, xatire munarining aldigha gülchembirek qoydi.

türkiye jumhur reisi rejep tayyip erdoghan ezerbeyjan jumhuriyet bayrimi munasiwiti bilen, ilham eliyéwge tebrik télégrammisi ewetti.

özbékstan, italiye, finlandiye, jenubiy koréye, shiwytsariye, shiwétsiye, sudan, marakesh, girétsiye, kuba, wéngriye, giruziye, ispaniye, ereb birleshme xelipiliki, iraq, xitay, rusiye, ruméniye, qazaqistan, litwaniye, amérika, gérmaniye, qirghizistan, misir, tajikstan, ukraina, türkmenistan, bélgiye, hindistan, norwégiye, seudi erebistan, liwan, iran, kirodiye qatarliq döletlermu pirézidént ilham eliyéwge tebrik télégrammisi ewetti.

1918-yili 28-may giruziyening tiblis shehiride mehmet emin resulzade bashchiliqidiki ezerbeyjan milliy shurasi, ezerbeyjan jumhuriyitining musteqilliqini élan qilidu. baku ermen we bolshéwik banditlirining ishghali astida bolghanliqi üchün fethali xan howski bashchiliqida teshkil qilinghan waqitliq ezerbeyjan hökümiti, herikitini bir mezgillik genje shehirige yötkeydu.

osmanli döliti ezerbeyjanning musteqilliqini tunji bolup étirap qilidu. nuri pasha (killigil) qomandanliqidiki kawkaz islam armiyesi ikki dölet otturisida tüzülgen kélishim ramkisida künséri éship bériwatqan ermen we bolshéwik tehditlirige qarshi yardemge ewetilidu. kawkaz islam armiyesi göwchay, salyan, aghsu we kürdemirni bolshéwik we ermen banditliridin tazilaydu, 1918-yili 15-séntebir bakuni qutquzidu. kawkaz islam armiyesining 130eskiri bakuni qutquzush urushida shéhit bolidu.

sherqning tunji démokratik jumhuriyiti dep qobul qilinidighan ezerbeyjanda, qisqa waqit ichide maarip, din we pikir erkinliki saheside islahatlar élip bérilidu, döletning öz puli bésilidu. jumhuriyetning "istiqlal xitabnamesi" de, irq, din, mezhep we jinsiyet ayrimchiliqi qilinmastin, barliq puqralargha teng-barawerlik hoquqi bérilidu.