jumhur reis erdoghan özbékistan we jenubiy koréyede ziyarette bolidu

türkiye awazi radiyosi xewiri: jumhur reis rejep tayyip erdoghan özbékistan pirézidénti shewket mirziyoyéwning teklipige binaen 29 – apréldin 1 – mayghiche özbékistanda dölet ishliri ziyaritide bolidu.

jumhur reislik sariyi axbarat wasitiliri merkizining bildürüshiche, uchrishishlarda, özbékistan – türkiye munasiwetlirini yenimu tereqqiy qildurushta tashlinidighan qedemler muzakire qilinidiken, hemde rayonluq özgirishler heqqide özara pikir almashturulidiken.

jumhur reis rejep tayyip erdoghan tashkent pirogrammisi dairiside awwal özbékistan aliy parlaméntigha xitab qilidiken, andin özbékistan pirézidénti shewket mirziyoyéw bilen birlikte türk we özbék soda – sanaetchilerning ishtirak qilishida ötküzülidighan soda – iqtisad munbiri yighinigha qatnishidiken. 1 – may küni türk – islam medeniyitide muhim orun tutidighan özbékistanning  qedimiy sheherliridin alimlar we mutepekkurlar diyari buxarada ziyarette bolidiken.

erdoghan 2 – 3 – may künliri jenubiy koréiye pirézidénti mon jainning teklipige binaen bu dölette resmiy ziyarette bolidiken. uchrishishlarda, jenubiy koréye – türkiye munasiwetliri, rayonluq we xelqara mesililer muzakire qilinidiken.

jumhur reislik sariyi axbarat wasitiliri merkizi teripidin bu heqte élan qilinghan bayanatta, jumhur reis rejep tayyip erdoghanning jenubiy koréye milliy mejlisinimu ziyaret qilidighanliqi, jenubiy koréye parlamént bashliqi chung sikyun bilen bir yerge jem bolidighanliqi, hemde jenubiy koréye karxanichiliri bilen körüshidighanliqi tekitlinip mundaq déyildi: «koréiye yérim arilida muqimliqni ishqa ashurush yolida nahayiti zor tirishchanliqlar körsitiliwatqan muhim bir basquchni bashtin kechürüwatimiz. bu basquchta jenubiy koréiye pirézidénti mon jainning namayen qiliwatqan siyasiy iradisi, terepler ara diyalog ornitish we hemkarliq ornitish zéminining hazirlinishida muhim rol oynimaqta. türkiye jenubiy koréye bilen nahayiti uzun tarixiy dostluq munasiwetlirige ige bolup, koréiye yérim ariligha munasiwetlik uchrishishlarni tépilghusiz purset dep qarimaqta, hemde kirizisni hel qilish yolida körsitiliwatqan tirishchanliqlarni qizghin qollimaqta.»