héytgahning imami jüme tahir öltürüldi

türkiye awazi radiyosi xewiri: weqeni öz közi bilen körgenlerning melumatlirigha asasen bérilgen xewerde, héytgah jamesining imami jüme tahirning 30 – iyul charshenbe küni etigende pichaqlinip öltürülgenliki élan qilindi. imam jüme tahirning jame aldida pichaqlanghanliqi eskertilgen xewerde, hujumchilarning kimliklirining namelum ikenliki qeyt qilindi.
xongkong taratqulirida élan qilinghan xewerlerde, weqege «süyiqest» dep baha bérilish birge, uyghurlarning jüme tahirni «xain» dep qaraydighanliqi tekitlendi. jüme tahir «zorawanliq» qa arilashqan uyghurlarni tenqid qilish bilen, xitay taratqulirida küntertipke kéliwatqan shexs idi.
qeshqer shehiride 15 – esirde sélinghan héytgah jameside, bolupmu jüme namizi we héyt namazlirida texminen 20 ming adem namaz oquyalaydu.
qeshqerning weziyiti keskin
düshenbe küni seherde yekende yüz bergen qanliq weqeler sewebidin qeshqer wilayiti teweside derijidin tashqiri qattiq bixeterlik tedbirlirining élinghanliqi qeyt qilinmaqta. merkiziy xongkonggha jaylashqan «jenubiy junggo seher pochtisi» ning xewirige asaslanghanda, bérish – kélishler qattiq tekshürülüwatqan sheherde, nurghunlighan kontrol nuqtiliri qurulghan bolup, xewpsizlik tarmaqliri toxtimay charlash élip bériwatmaqta iken.
xitay dölet taratquliri düshenbe küni seherde qeshqer wilayiti yeken nahiyesining ikki yézisida keng kölemlik «térrorluq hujumi» yüz bergenlikini we «hujumchilarning étip öltürülgenliki» ni xewer qilghan idi.
chet ellerdiki uyghur teshkilatliri bolsa, ramizan éyidiki cheklimiler we sotlimastin étip tashlashlargha qarshi naraziliqlarning qattiq basturulushi netijiside, qanliq toqunushlarning yüz bériwatqanliqini tekitlimekte.
yerlik we chet ellik muxbirlarning weqe yüz bergen rayonlarda musteqil tekshürüshige ruxset bérilmesliki sewebidin, weqening mahiyitini bilish yaki weqeni delillesh mumkin emes. yene bir tereptin, qanliq toqunushlar yüz bérip aridin 1 yérim kün ötkende xewer qilghan resmiy taratqular, ölgenler we yarilanghanlarning éniq sanini hazirghiche élan qilmidi.