natsist yer asti teshkilati délosi we yawropada bash kötürgen irqchiliq we islam endishisi

gérmaniyede natsist sotsiyalist yer asti térrorluq teshkilati délosi bashlanghanliqigha 5 yil bolghan bolsimu, délo hazirghiche aydinglashmidi. bu délodin sawaq alidighanliqini bildürgen gérmaniye hökümiti we jemiyitide tolimu epsus irqchiliq we islam endishisi hadisisi barghanche ewjige chiqmaqta.

gérmaniyede sekkizi türk 10 kishini öltürüsh, banka bulash we bombiliq hujumlarni sadir qilish bilen eyiblengen natsist sotsiyalist yer asti térrorluq teshkilati délosi asasen axirliship qaldi. miyonxin aliy sot mehkimiside 5 yildin artuq dawamlashqan déloda bash gumandar bété zihchéptin bashqa bu teshkilatqa yardem qilghan 4 gumandar sotlandi. bash gumandar bété zihchéptingha muddetsiz qamaq jazasi bérildi. qalghan töt gumandargha muddetlik qamaq jazasi bérildi.

teptish mehkimisi we gérmaniye xewpsizlik organliri natsist sotsiyalist yer asti térrorluq teshkilatining 3 kishidin teshkil tapqanliqini bildürmekte. bété zihchéptintin bashqa bu teshkilatning ezaliridin uwé böhhard we uwé mundlosning 2011-yili 4-noyabirda banka bulash weqeisidin kéyin yoshuruniwalghan jayda jesitining tépilishi we bu shexslerning özini öltürüwalghanliqining ilgiri sürülüshi qatarliqlar nurghun guman peyda qildi. natsist sotsiyalist yer asti térrorluq teshkilati délosining bash gumandari bété zihchéptinning teshkilat ezaliri turidighan öyge ot qoyuwetkendin kéyin saqchilargha teslim bolushi we bu teshkilatning asasiy qanunni qoghdash teshkilati bilen chétishliqi bolushi qatarliqlar bu déloning tolimu murekkep ikenlikini körsitip béridu, shundaqla bu ehwal nurghun guman peyda qilidu. bolupmu gérmaniye istixbarat orgini hésablinidighan asasiy qanunni qoghdash teshkilatining natsist sotsiyalist yer asti térrorluq teshkilati bilen munasiwetlik 130 delilni yoq qiliwétishi, bu térrorluq teshkilatining keynide qaysi küchlerning barliqini éniqlighili bolmaydighan halgha keltürüp qoydi. derweqe, qarilighuchi adwokatlar bu teshkilatning 3 kishidin teshkil tapqanliqigha ishenmeydu.  

natsist sotsiyalist yer asti térrorluq teshkilati délosi axirlashqan bolsimu, xewpsizlik organlirining bolupmu asasiy qanunni qoghdash teshkilatining bu teshkilat toghruluq némilerni bilidighanliqi hazirghiche aydinglashmidi. bu térrorluq teshkilati jinayetlerni sadir qilghandin kéyin gérmaniye xewpsizlik organliri deslep jinayetke qurban ketkenlerning aile-tawabiatliridin gumanlinip, bu jinayetlerning irqchiliq jinayiti bolush éhtimalini tamamen ret qilghanidi. uning üstige gérmaniye taratquliri natsist sotsiyalist yer asti térrorluq teshkilatining pash bolushidin ilgiri sadir bolghan jinayetlerni «aylanma kawab jinayetliri»dep atashqanidi. gérmaniye xewpsizlik organlirining jinayet we gumandarlargha munasiwetlik barliq uchur-melumat we delillerni nezerdin saqit qilishi we jinayetlerning irqchiliq jinayiti  bolush éhtimalini ret qilishi sewebidin, bu teshkilat uzunghiche jinayet sadir qilishni dawamlashturup jemiy 10 ademning jénigha zamin boldi.

natsist sotsiyalist yer asti térrorluq teshkilati délosining axirlishishi bilen birlikte, gérmaniyediki irqchiliq we islam endishisi hadisisining ewjige chiqqanliqining eng tipik ipadisi bolghan ashqun ongchil partiyesi « AfD » bolsa ray sinashqa köre, gérmaniye siyasitide eng köp qollighuchisi bolghan ikkinchi chong partiye bolghan. bu partiyening eng chong ikkinchi partiye halitige kélishige qarap, irqchiliq we islam endishisi hadisisi gérmaniye siyasiti we jemiyitide yiltiz tartti, dések xatalashqan bolmaymiz. uzundin buyan gérmaniye jemiyitide saqlinip kéliniwatqan chet ellik we islam düshmenliki bu ashqun ongchil partiye bilen téximu öz ipadisini tapti.

ashqun ongchil partiyesi « AfD »la emes birleshme hökümetning shirikliridin bolghan xiristiyan sotsiyalistlar partiyesiningmu  bu ashqun ongchil partiyege oxshash heriket qilip chet ellik we islam düshmenlikini téximu ulghaytidighan bayanatlarni bérip siyasetlerni yolgha qoyushi gérmaniyening özgiriwatqanliqini körsitip béridu. 2-dunya urushidin buyan gérmaniye jemiyitide tunji qétim irqchiliq we melum bir dingha bolghan düshmenlik bunchilik ewjige chiqmighanidi.

gérmaniye jemiyitining özgiriwtqanliqini körsitip bériwatqan yene bir ehwal bolsa gérmaniye döletlik putbol komandisidur. 2014-yilliq dunya longqisigha érishken gérmaniye döletlik putbol komandisi yillardin buyan garmonik we köp medeniyetlik jemiyet hayatining muwappeqiyetining ipadisi dep qarilip kéliwatti. mesud özil, ilkay gündoghan, sami kéchdira, lukas podolski, jérom baténggha oxshash köchmen aililerning bu  perzentliri gérmaniye döletlik putbol komandisi üchün zor küch serp qildi. biraq gérmaniye döletlik putbol komandisimu irqchiliqtin nisiwésini aldi. ashqun ongchil partiyesi « AfD »ning bashliqi aléksandér gawlendning «millet baténgni xalimaydu»dégen sözliri irqchiliqning eng tipik ipadisidur. bu bimene hadisidin kéyinla mesud özil we ilkay gündoghanning türkiye jumhuriyiti jumhur reisi rejep tayyip erdoghan bilen engliyede resimge chüshüshi gérmaniyede qattiq ghulghula qozghidi. derweqe, gérmaniye döletlik putbol komandisining 2018-yilliq dunya longqisi musabiqisining guruppa musabiqiliride shallinip kétishining mesuliyiti mesud özilge dönggep qoyuldi we mesud özilning jumhur reis rejep tayyip erdoghan bilen chüshken süriti tarqitildi. bu hadisiler gérmaniyede irqchiliq we islam endishisi hadisisining yuqiri pellige chiqqanliqining ipadiliridur.