بىرمادا ئارمىيە تەرەپ Facebook نى تاقاشنى قارارلاشتۇردى

تۈركىيە ئاۋازى رادىيوسى خەۋىرى: بىرما خەۋەرلىشىش ۋە ئۇچۇرلاشتۇرۇش مىنىستىرلىقى تەرىپىدىن ئېلان قىلىنغان باياناتتا، دۆلەت ئىگىدارچىلىقىدىكى تېلېگراف شىركىتى MPT ۋە بۇ دۆلەتتىكى شەخسىي ئىنتېرنېت مۇلازىمېتىرلىرىغا، 7-فېۋرالغىچە Facebook قا كىرىشىنى چەكلەش توغرۇلۇق يوليورۇق چۈشۈرۈلگەنلىكى ئۇقتۇرۇلدى.

مىنىستىرلىقنىڭ باياناتىدا، بۇ قارارنىڭ دۆلەتنىڭ مۇقىملىقىغا كاپالەتلىك قىلىش ئۈچۈن چىقىرىلغانلىقى تەكىتلىنىپ مۇنداق دېيىلدى: «نۆۋەتتە  بىر قىسىم كىشىلەر Facebook  نى ئىشلىتىپ، يالغان خەۋەر - ئۇچۇرلارنى ھەمبەھىرلەش ئارقىلىق خەلقنىڭ نەزىرىدە ئۇقۇشماسلىقنى كەلتۈرۈپ چىقارماقتا.»

ھۆكۈمەتنىڭ يوليورۇقىدىن كېيىن،  23 مىليون ئابونتقا ئىگە MPT ، Facebook ، Instagram ۋە WhatsApp يۇمتاللىرىغىمۇ چەكلىمە قويدى، باشقا تېلېگراف شىركەتلىرى بولسا پەقەت Facebook نىلا چەكلىدى.

Facebook باياناتچىسى ئاندىرى ستونېمۇ، بىرمادا Facebook قا  كىرگىلى بولمايۋاتقانلىقىنى دەلىللىدى.