hijret bizdin némini telep qilidu? (awazliq)

eziz mumin qérindashlar! jüme küninglar mubarek bolsun!

allahning rehmiti bilen aldimizdiki seyshenbe küni muherrem éyining tünji künige yeni, hijriyening 1440 – yiligha qedem qoyghan bolimiz. hijretning bashlinishi we xatire yil béshi bolghan bu künlerning pütün millitimizge we pütün islam dunyasigha xeyrilik élip kélishini ulugh allahtin téleymiz. 

kainatning iptixari peyghembirimiz muhemmed eleyhissalamning dewitini qobul qilmighan mushriklar, peyghember eleyhissalamgha we möminlerge qilmighan zulum – sétem, qéyin qistaqliri qalmighan idi. axiri mekkide nepes élish mumkin bolmaydighan halgha kélip qalghanda, allah taala möminlerni öz dinida erkin yashiyalishi, ibadetlirini rahet ada qilalishi üchün hijret qilishqa buyridi. deslepte möminlerning bir qismi medinige mangdi.  andin peyghember eleyhissalam sadiq dosti ebu bekir reziyellahu enhu bilen birge medenige hijret qildi.

eziz qérindashlar! islam tarixining bu shereplik sepiri, ixtiyari bir köchüsh emes, belki heq we heqiqetning yer yüzige hakim bolushi üchün imkaniyet izdeshning ülgilik herikiti bolghan idi.

hijret؛ allahqa bolghan imanning, sadaqet we teslimiyetning, sebirchanliq we meydanida mustehkem turushning namayendisidur.

hijret؛ allahning rizasi, insaniyetning xatirijemliki we tinchliqi üchün barliqidin waz kécheleydighan pidakar muhajirlarning, özilirige qachaq achidighan mert ensarlar bilen didarlishishidur.

bu japaliq we beriketlik seper qérindashlargha aylandurghan muhajirlar bilen ensarlar heqqide quran kerimde mundaq xush xewer bérilidu:

«hemmidin ilgiri iman éytqan muhajirlardin we ensarlardin, yaxshiliq qilish bilen ulargha egeshkenler (yeni tabiinlar we qiyametkiche ularning yolida mangghanlar) din allah razi boldi, ularmu allahtin memnun boldi. allah ulargha astidin östenglar éqip turidighan jennetlerni teyyarlidi. ular jennette menggü qalidu. bu chong bexittur» (süre töwbe, 100 – ayet)

eziz qérindashlar! hijret saadet dewride bir qétim yüz bérip axirilashqan weqe emes. belki bügünki kündimu közliri yashqa tolghan nurghunlighan musulmanlar yurt – makanliridin ayrilip hijretke atlanmaqta. özige ensarliq qilalaydighan, yaxshi insanlargha séghinmaqta. bizning yelkimizge chüshken mesuliyitimiz bolsa, hijretning bu xatire künliride bu heqiqetni yene bir qétim eske élip, zulum we adaletsizlikning axirilishishi üchün tirishchanliq körsitishtin ibarettur.

hijret؛ yene bir menidin her türlük illetlerni tashlap, yamanliqtin uzaqlishish we yaxshiliq yoligha qarap qedem tashlashtur. shunga peyghember eleyhissalam hijretning bu meniwiy teripini mundaq ipadilep bergen idi:

«musulman qolidin we tilidin bashqa musulmanlargha ziyan yetmeydighan kishidur. muhajir bolsa, allahning meniy qilghan ishlirini tashlighan kishidur» (buxari, iman babi, 4 – hedis)

eziz mömin qérindashlar! hijrette muhim bolghini semimiyet bolup, hijretning ximirturichi allahqa bolghan sadaqet we resulullahqa bolghan muhebbettur. mömin ariqida tashlap qoyghan azabliq künlirige qarimastin, iman we ümid bilen yashashni bashlighanda andin muhajir bolidu. muhajir bolsa, haramdin yüz örüp, qetiyilik bilen halalni izdeshni dawamlashturghanda andin hijretning heqiqiy menisini tapqan bolidu.

hörmetlik mömin qérindashlar! bu hijriyening yéngi yiligha qedem qoyuwatqan chéghimizda bir musulmanlargha yarishidighan eng muhim ish, ötmüshidin hésab élip, kelgüsini retke sélishtin ibarettur. asiyliqtin itaetke, gunahtin töwbige, chéchilangghuluqtin birlikke, düshmenliktin qérindashliqqa, jahalettin ilim – meripetke we yamanliqtin yaxshiliqqa hijret qilishtur.

qéni emise kélinglar! hijret ehdimizni yéngilayli! bu mubarek jüme künidiki ehdimiz, zalimlarning zulmi tüpeylidin yürt - makanlirini tashlap chiqip kétishke mejbur bolghan muhajir qérindashlirimizgha ensar bolush bolsun!  

hayatliq sepirimizde kamil bir iman, salih bir emel we güzel bir exlaqqa sazawer bolushqa yene bir qétim niyet qilayli! yönilishimiz, yolimiz we hijritimiz allahning rizaliqi we resullahning muhebbiti terepke bolsun!  amin!!!