yawropa 2050-yili musulmanlishamdu?
yawropadiki musulmanlarning omumiy nopus nisbitide, esli köchmen, emma yawrpada olturaqlashqan musulmanlar nopusining tughut nisbitidiki ösüsh hemde musapirlar éqimining tesiride dawamliq éshish körülmekte.
türkiye awazi radiyosi xewiri: merkiziy washingtongha jaylashqan péyu tetqiqat inistituti élan qilghan melumatlargha asaslanghanda, gérmaniyege bolghan köch «ottura süret» te dawamlashqan teqdirde, künimizde texminen %6 bolghan musulmanlarning nopus nisbiti, ikki hesse köpiydiken we 2050-yilgha kelgende %11ge yétidiken.
tetqiqatchilar «ottura süret» dégende, gérmaniyege musapirlar köchi pütünley toxtisimu, oqughuchi, ishchilar köchi we aililerning birlishishige oxshash «normal» köchning burunqi yillardiki süret bilen dawamlishishini asas qilidu.
gérmaniyege her türlük köch toxtighan teqdirdimu 2050-yilgha kelgende musulmanlar nopus nisbitining %9 ge chiqidighanliqi texmin qilinmaqta. eger köch, musapirlar éqimi partlighan 2014-yilidin 2016-yilighiche bolghan mezgillerdikidek dawam qilghan teqdirde, 2050 –yili musulmanlarning gérmaniye nopusining %20 ni igileydighanliqi perez qilinmaqta.
tetqiqatchilar köchtin bashqa, musulmanlar nopusining éshishini keltürüp chiqiridighan ikki asasiy sewebni, otturiche yash nisbiti we tughut nisbiti dep körsetmekte. tetqiqatchilarning körsitishiche, gérmaniyediki musulmanlarning otturiche yéshi 31, musulman bolmighanlarning otturiche yéshi 47 iken.
yawropada musulmanlar arisidiki tughut nisbitimu musulman bolmighanlargha sélishturghanda yuqiri iken. sherqiy jenubiy asiyaliq musulmanlar köp salmaqni igileydighan engliyede her bir musulman ayalgha 2.9 bala toghra kélidiken. biraq, engliyede musulman bolmighan ayallargha chüshken bu reqem 1.8 iken.
gérmaniyede musulman we musulman bolmighan ayallarning tughut nisbitidiki perq, bashqa yawropa döletlirige sélishturghanda kichik. tetqiqatchilarning qarishiche, gérmaniyediki musulman ayallar arisida otturiche tughut nisbiti 2015-yildin 2020-yilighiche bolghan mezgilde 1.9 bala bolsa, musulman bolmighan ayallarda bu reqem 1.4 bolidiken.
épyu inistitutining yawropa ittipaqi döletliri, norwégiye we shiwiyétsariyediki sanliq melumatlarni asas qilghan tetqiqat netijiliride körsitilishiche, din özgertish arqiliq emelge ashqan nopus xilmu xilliqi, yawropa miqyasida muhim tesir peyda qilghidek derijide bolmaydiken. 2010-yilning otturiliridin 2016-yilning otturilirighiche islam dinidin chiqip ketkenlerning sani, islam dinigha kirgenlerning sanidin 60 ming kishi köp iken.
mustemlikichi ötmüshi bolghan firansiye, 5 milyon 700 ming musulman nopusi bilen, yawropada eng köp musulman yashaydighan dölet. künimizde firansiyede musulmanlar nopusi omumiy nopusning %8.8 ni igileydu, shiwétsiyede bu san %8.1, engliyede bolsa %6.3.
2015-yilda eng uchigha chiqqan musapirlar kirizisida musapirlarni qobul qilishqa yéqinmu kelmigen we musapirlargha qarshi eng qattiq siyaset yürgüzüp, naraziliqning merkizige aylanghan polshada, musulmanlar nopusining omumiy nopustiki nisbitining %0.1 din töwen bolushi alahide diqqet qozghaydu.
