«yawropa ittipaqi pelestin mesiliside bölünüp ketti»
yawropa ittipaqi tashqi munasiwetler we xewpsizlik siyasetliri aliy wekili josép borrél ukraina-rusiye urushida birdek heriket qilghan yawropa ittipaqi döletlirining pelestin mesilisige kelgende bölünüp ketkenlikini éytti.
türkiye awazi radiyosi xewiri: josép borrél amérika qoshma ishtatlirining stanford uniwérsitétining xuwér institutida qilghan sözide, ghezze rayonining nöwettiki weziyiti heqqide toxtaldi.
borrél pelestin hökümitini kücheytish üchün siyasiy basquchning bashlinishi kéreklikini tekitlep mundaq dédi:
«bu insaniy tiragédiyedin qutulushning birdinbir yoli kirizisni ikki döletlik tüzüm asasida hel qilish charisidur. buni biz téximu yuqiri awazda éniq otturigha qoyushimiz kérek. herqanche qiyin bolsimu, insaniyetning wijdanigha dagh chüshüridighan bu insaniy tiragédiye (israiliyening rayonda dawamlashturuwatqan hujumliri) gha xatime bérishtin bashqa chiqish yoli yoqtur.»
borrél yawropaning pelestin mesiliside bölünüp ketkenlikini eskertip mundaq dédi:
«yawropa ittipaqi elliri bezi ehwallarni hésabqa almighanda, rusiyege qarshi birdek heriket qildi, jümlidin ukrainani siyasiy, iqtisadiy jehettin, her jehettin birdek qollidi. ghezze mesilisige kelgende undaq qilalmidi.»
u yawropa ittipaqining kirizisni ikki döletlik tüzüm asasida hel qilish üchün mesuliyetni öz üstige alghanliqini we ereb ittipaqdashlar bilen bolghan alaqining dawam qiliwatqanliqini bayan qilip mundaq dédi:
«amérika terep kirizisni ikki döletlik tüzüm asasida hel qilish pirinsipida ching turushta sel charchap qalghandek qilidu.»
igilinishiche, israiliyening 7-öktebirdin bashlap ghezze rayonida dawamlashturuwatqan hujumlirida köpinchisi balilar we ayallarni öz ichige alghan 35 mingdin artuq pelestinlik hayatidin ayrilghan.
