ukrainada herbiy seperwerlik shertliri chingitildi
ukraina pirézidénti wolodimir zélénskiy herbiy seperwerlik shertlirini chingitish qanunini testiqlidi.
türkiye awazi radiyosi xewiri: ukraina parlaméntining tor bétide, pirézidént zélénskiyning seperwerlik, herbiylikke tizimlitish we herbiylik xizmitige munasiwetlik bezi mesililerni yaxshilash toghrisidiki yéngi seperwerlik qanunini testiqlighanliqi élan qilindi.
mezkur qanun élan qilinip bir aydin kéyin, resmiy ijra qilinidu. ukraina parlaménti 11-aprél (2024) herbiy seperwerlik shertliri chingitilghan qanun teklipini maqullighan idi.
qanun boyiche, seperwerlikte 18 yash bilen 60 yash otturisidiki erler her waqit herbiy kénishkisini élip yürüshi kérek. kénishkini herbiy tizimlash ishxanisining wekili yaki saqchining telipige binaen körsitishi kérek. bu yash otturisidiki erler chégra éghizida yaki chégra rayonida, chégra qoghdash xadimi telep qilghan ehwalda herbiy kénishkisini körsitishi kérek.
chet elde yashawatqan, emma herbiy kénishkisi bolmighanlar, yéngi pasport alalmaydu. qanun élan qilinghandin kéyin, herbiy mejburiyet öteshke tégishlik kishiler 60 kün ichide turushluq adrésini, alaqilishish nomurini we herbiy kénishkisini yéngilishi kérek.
60-18 yash otturisidiki herbiy mejburiyet öteydighan kishiler, herbiylikke tizimlitish uchurlirini yéngilighandinla ukrainaning chet ellerdiki diplomatik organlirining mulazimitige érisheleydu.
