amérika, engliye we firansiye iranni, rusiye isirailiyeni eyiblidi
b d t bash katipi antoniyo gutérrés ottura sherqte jiddiy weziyetning téximu keskinliship ketmesliki üchün iran bilen isirailiyeni salmaq bolushqa chaqirdi.
türkiye awazi radiyosi xewiri: b d t bash katipi antoniyo gutérrés isirailiyening telipi bilen toplanghan xewpsizlik kéngishi yighinida söz qilip, ottura sherqte jiddiyleshken weziyetning rayon we dunya üchün xeterlik ikenlikini bildürdi.
u: «hazir salmash bolidighan we jiddiy weziyetni peseytidighan waqit. iranning rayonda weziyetni téximu jiddiyleshtürüwetkenlikini eyibleymen we tereplerni salmaq bolushqa chaqirimen» dédi.
u 1-aprél (2024) isirailiyening süriye paytexti demeshiqtiki elchixana binasini bombardiman qilghanliqinimu shu küni eyibligenlikini xatiriletti we mundaq dédi:
«ottura sherqte bir qanche septe herbiy toqunushqa seweb bolushi mumkin bolghan heriketlerdin imkaniyetning bariche yiraq turush lazim.»
u ghezzediki insaniy kirizisning éghirlashqanliqini, rayonda urush toxtitishning zörür ikenlikini, esirlerni qoyup bérish we insanperwerlik yardemlirining yetküzülishide hemme kishining mesuliyiti barliqini qeyt qildi.
u sözining axirida: «meyli rayon bolsun yaki dunya bolsun, urushqa berdashliq bérelmeydu» dédi.
amérika, engliye we firansiye qatarliq döletlerning b d t diki daimiy wekilliri iranni eyiblidi. rusiyening daimiy wekili wassily nébénziya bolsa, isirailiyening 1-aprél süriyediki iran elchixana binasigha qilghan hujumini küntertipke élip keldi.
u mundaq dédi:
«biz hazir körgen netije shuki, diplomatik orungha hujum qilish, xelqaraliq qanun boyiche urush sewebi bolup hésablinidu. eger gherbtiki bir döletning diplomatik orni mushundaq bombardiman qilinghan bolsa, bu yerde derhal intiqam deyttinglar.»
arqidin iran daimiy wekili eli kérim maqam söz qildi. u b d t xewpsizlik kéngishining isirailiyening demeshiqtiki iran elchixana binasigha qilinghan hujumni körmeske salghanliqini ilgiri sürdi.
u isirailiyening hujumining xelqaraliq qanungha xilap ikenlikini, emma amérika we engliye qatarliq döletlerning mezkur mesilini xewpsizlik kéngishide basturup qoyghanliqini؛ iranning bolsa, qanunluq özini qoghdash hoquqidin paydilinip, isirailiyening herbiy bazilirini hujum nishani qilghanliqini qeyt qildi.
isirailiyening b d t diki daimiy wekili gilas érdan iranning siyasiy meqsetlirini emelge ashurush üchün mezkur hujumlarni élip bérip, rayon tinchliqigha tehdit salghanliqini eskertti.
u mundaq dédi:
«xelqaraliq jemiyet iranni toxtitish üchün heriketke ötüshi kérek.»
isirailiye 1-aprél (2024) iranning süriye paytexti demeshiqtiki elchixana binasini bombardiman qilip, yette iranliqni öltürgen idi. bularning ichide iran inqilabiy muhapizetchiler qismining ikki générali bar idi.
iran buning dölet zéminigha hujum qilghanliq bolidighanliqini we öch alidighanliqini élan qilghan idi. isirailiye bolsa, iranning hujumlirigha jawab qayturidighanliqini bildürgen idi.
iran 13-aprél kéchide isirailiyege qaritip yüzlerche uchqu we onlarche bashqurulidighan bomba qoyup berdi. netijide, isirailiyening bezi herbiy bazilirigha bashqurulidighan bomba chüshkenliki qeyt qilindi.
isirailiye uchqu we bashqurulidighan bombilarning köpinchisining hawa qalqan sistémisi teripidin tosuwélinghanliqini, jenubtiki herbiy bazigha bir bashqurulidighan bomba chüshkenlikini uqturdi.
