gutérrés bilen samih shükri ghezzede urush toxtitishni chaqiriq qildi

türkiye awazi radiyosi xewiri: misir tashqi ishlar ministiri samih shükri bilen b d t bash katipi antoniyo gutérrés qahirede körüshkendin kéyin, qoshma muxbirlarni kütüwélish yighini achti.

tashqi ishlar ministiri samih shükri: «ghezzede derhal urush toxtitishni we esirlerni qoyup bérishni chaqiriq qilimiz. ghezzege téximu köp insanperwerlik yardemliri kirishi kérek» dédi.

u ghezzediki weziyetning tiragédiyelik hal alghanliqini we buning hel qilinishi kéreklikini tekitlep, pelestinliklerni mejburiy yurt-makanliridin qoghlashqa we kolléktip halda jazalashqa qarshi ikenliklirini bildürdi.

b d t bash katipi gutérrés misirning tinchliq üchün dunyawi qutuplardin biri ikenlikini qeyt qildi.

u misir pirézidénti abdulfettah essisi we shükri bilen ghezzede qiyin sharaitlar hemde ishghal astidiki gherbiy qirghaq weziyitini öz ichige alghan nurghun muhim mesililerni muzakire qilghanliqlirini bildürüp: «dunya qoral awazlirini jimiqturush we ghezzede insanperwerlik urush toxtitishni kapaletke ige qilish waqtining yétip kelgenlikini bilidu» dédi.

u pelestin xelqini kolléktip jazalashning héchqandaq sewebining yoqluqini eskertip, refah chégra éghizining ghezzege insanperwerlik yardemliri kiridighan asasliq jan tomuri ikenlikini, biraq bu tomurning insanperwerlik yardemliri qachilanghan yük aptomobillirigha cheklime qoyush tüpeylidin tiqilip qalghanliqini qeyt qildi.

isirailiyening ghezzege 7-öktebir (2023) din buyan dawamlashturuwatqan hujumlirida köpinchisi kichik balilar bolup 32 mingdin artuq pelestinlik jénidin ayrildi.