abbas: ghezzede yüz bergenlerde dunya döletliriningmu mesuliyiti bar
pelestin dölet reisi mehmut abbas ghezzede yüz bergenlerde, israiliye we isirailiye ishghalchi hökümitining tajawuzchiliq herikitini chongqurlashturushqa ilhamlandurghan dunya döletlirining mesuliyiti barliqini éytti.
türkiye awazi radiyosi xewiri: pelestin dölet reisi mehmut abbas ishghal astidiki ramallahta firansiye pirézidénti makron bilen körüshti.
pelestin téléwiziyesi mehmut abbas-makron söhbitidin kéyin élan qilinghan bayanatlarni tarqatti.
mehmut abbas pelestinde yüz bergen ishlarning mesuliyitining israiliyede ikenlikini bildürüp, bu ishlarda israiliyeni tajawuzchiliqini chongqurlashturushqa ilham bergen dunya döletliridimu oxshash mesuliyetning barliqini eskertti.
u resmiy urush toxtitishni, bixeterlik karidorining échilishini, su, éléktr, yéqilghu we bashqa éhtiyajlarning kapaletke ige qilinishini telep qilghanliqlirini tekitlep: «ghezzede bolsun yaki iyordan deryasining gherbiy qirghiqida bolsun, pelestinliklerning yurt-makanliridin qoghlinip, pelestinning sirtigha köchürülüshige qarshi turimiz» dédi.
u b d t xewpsizlik kéngishidiki tereplerge we firansiye pirézidénti makrongha, isirailiyening hujumlirini derhal toxtitishni, xelqaraliq tinchliq konféransining ötküzülüshini we mesilini siyasiy yol bilen hel qilishni chaqiriq qilip: «ghezze ishghal qilinghan zéminlarning bir parchisi. ghezzege qaritilghan qismen yaki bixeterlikni mezmun qilghan her qandaq hel qilish charesini ret qilimiz. biz keng dairelik siyasiy hel qilish charesige emel qilimiz» dédi.
firansiye pirézidénti makron: «her qandaq ish héchbir yerde térrorluq hujumining toghriliqini körsitip bérelmeydu. pelestin xelqige we hamas bashlighan hujumdin kéyin peyda bolghan shiddetlik zorawanliqlarning barliq qurbanlirigha teziye bildürimen» dédi.
u tinchliq we bixeterlik heriketlirining üch asasiy bolushi kéreklikini, bularning «térrorluq guruppilirigha qarshi küresh, puqralarning qoghdilishi we siyasiy tirishchanliqlarning qaytidin bashlinishi» ikenlikini bildürdi.
firansiye pirézidénti makron bir qanche saetlik ramallah ziyaritidin ilgiri isirailiyeni ziyaret qilghan idi. u bu jeryanda «térrorluq guruppilirigha qarshi urush» dep atighan «xelqara birleshme qoshun qurush» ni chaqiriq qilghan idi.
