israiliye eskerliri ishghaliyet astidiki gherbiy qirghaqta töt pelestinlikni shéhit qildi
israiliye eskerlirining ishghaliyet astidiki gherbiy qirghaqqa qarashliq nurghun yéza, nahiyelerde kéchiche élip barghan bésip kirip tutqun qilish herikiti jeryanida töt pelestinlik shéhit bolup, onlighan kishi yarilandi.
türkiye awazi radyosi xewiri: ishghaliyet astidiki gherbiy qirghaqqa qarashliq nurghun yéza, nahiyeler israiliye eskerlirining her xil hujumlirigha uchridi.
ramallahning budrus yézisigha qilinghan hujumda yüz bergen toqunushta, bir pelestinlik israiliye eskerliri teripidin étip öltürüldi. yarilanghan yene bir pelestinlik doxturxanida dawalanmaqta.
israiliye eskerlirining nablusqa qilghan hujumidimu bir pelestinlik israiliye eskerliri teripidin étip öltürüldi. ramallahta bolsa, bir yehudiy köchmenning qoralliq hujumi sewebidin yene bir pelstinlik puqra jénidin ayrildi.
nur shems musapirlar lagérida yarilanghan 16 yashliq pelestinlik ösmürmu jiddi qutquzush aptomobilining kirishini israiliye eskerliri tosiwalghan bolghachqa qan yétishmey jiddi qutquzush aptomobilida jan üzdi.
israiliye eskerliri gherbiy qirghaqning oxshimighan jaylirida, sabiq parlamént ezaliri we hamas mesullirinimu öz ichige alghan 100 neper pelestinlikni tutqun qildi.
pelestin mehbuslar jemiyiti axbarat mesuli emani seraxane israiliye eskerlirining 7-öktebirdin buyan gherbiy qirghaqta we sherqiy quddusta 850 neper pelestinlikni tutqun qilghanliqini bildürdi.
hamasning herbiy qaniti qasssam birigadisi 7-öktebirde israiliyege «aqsa tufani» namliq keng kölemlik hujum bashlighanliqini élan qilghan we ghezzedin israiliyege minglighan rakétamiyot atqandin bashqa yene, qoralliq guruppilar rayondiki olturaq rayonlargha bésip kirgen idi.
israiliye qisimlirimu urush ayropilani bilen ghezze rayonigha qarshi «tömür qilich» herikitini bashlighanliqini élan qilghan idi.
künséri keskinlishiwatqan toqunushta her ikki tereptin minglighan kishi jénidin ayrildi.
