teywendiki musteqilliq qollighuchilirining rehbiri amérikada ziyarette bolidu
xitay teywendiki musteqilliq qollighuchilirining rehbiri ley ching téning kéler ay amérikada ziyarette bolushidin qattiq endishe qilmaqta.
türkiye awazi radiyosi xewiri: teywenning hazirqi muawin pirézidénti we kelgüsi pirézidéntliq saylimining namzatliridin biri bolghan ley chingténing kéler ay ishqa ashurushi pilanliniwatqan amérika ziyariti sewebidin xitay amérikagha naraziliq notasi tapshurdi.
xitay tashqi ishlar ministirliqi bayanatchisi maw axbarat élan qilish yighinida, «amérika bilen teywen otturisidiki herqandaq resmiy munasiwetke qarshi turidighanliqini» bildürdi we mezkur ziyaret sewebidin amérikagha naraziliq notasi tapshurulghanliqini eskertti.
maw teywendiki «bölgünchi rehber namzati» ning pilanliq ziyaritige munasiwetlik ehwallarni yéqindin közitiwatqanliqini eskertip, döletning milliy igilik hoquqi we zémin pütünlükini qoghdash üchün qetiy we küchlük tedbirlerning yolgha qoyulidighanliqini éytti.
maw: «biz teywendiki musteqilliq qollighuchilirining her qandaq nam bilen we her qandaq seweb bilen amérikani ziyaret qilishini we amérikaning bu bölgünchilerge hemde ularning bölgünchilik paaliyetlirige köz yumushini we qollap - quwwetlishini ret qilimiz» dédi.
analizchilar ley ching-téning teywende 1-ayda ötküzülmekchi bolghan pirézidéntliq saylimida eng yaqturilidighan namzatlardin biri bolushi sewebidin mezkur amérika sayahitining «simwolluq» alahidikke ige bolidighanliqini bildürmekte.
xitay hem teywen pirézidénti sey yingwénni, hem muawin pirézidént bolghan ley ching téni «bölgünchi» dep eyiblep, ular bilen alaqilishishni ret qilip kelmekte.
ley ching téning amérika ziyariti heqqide tepsiliy melumat bérilmidi.
teywenning muawin tashqi ishlar ministiri aléksandér tah ray bu sayahetning «ötken yillarda jenubiy we ottura amérikada élip bérilghan sayahetlerdikige oxshash pilanlinidighanliqini shundaqla amérikaning tranzit (ötkünchi) béket bolidighanliqini bildürdi.
